Prokuroria e Posaçme Kundër Korrupsionit dhe Krimit të Organizuar ka rilexuar pretencën për dosjen “Metamorfoza”, duke kërkuar dënime me burg për biznesmenin Pëllumb Gjoka dhe ish-shefin e policisë Ardit Hasanbegaj. Çështja është veçuar nga të pandehurit e tjerë dhe po shqyrtohet me gjykim të shkurtuar.
SPAK ka ngritur akuza për “sigurim kushtesh dhe mjetesh për të kryer vrasje”, “grup kriminal” dhe “armëmbajtje pa leje”. Organi i akuzës ka kërkuar 14 vite burg për Pëllumb Gjokën dhe 9 vite burg për Ardit Hasanbegaj.
Në rast se shpallen fajtorë, të pandehurit përfitojnë nga gjykimi i shkurtuar, çka nënkupton uljen me një të tretën e dënimit.
Seanca e radhës është shtyrë për në 9 mars, datë kur pritet të paraqiten konkluzionet përfundimtare nga avokatët mbrojtës.
Ndërkohë, biznesmeni Pëllumb Gjoka, së bashku me disa të pandehur të tjerë, po përballet me procedurë të zakonshme në një tjetër dosje të “Metamorfozës”, që lidhet me vrasjen e Gjin Ndojit, i njohur edhe me mbiemrin Boriçi.
