SPAK ka vendosur një tjetër masë ndaj Erion Veliajt dhe bashkëshortes së tij, Ajola Xoxa, këtë herë për shkak të dyshimeve për fshehje pasurie.
Sipas një njoftimi zyrtar të Prokurorisë së Posaçme, ndaj çiftit është regjistruar një procedim penal për disa vepra penale që përfshijnë korrupsionin, pastrimin e parave dhe mosdeklarimin apo deklarimin e rremë të pasurisë.
Në kuadër të këtij hetimi, Gjykata e Posaçme ka vendosur masën e sigurimit pasuror “sekuestro preventive” mbi dy pasuri të paluajtshme pranë rezidencës “Kodra e Diellit”, ku çifti jeton aktualisht.
Pasuritë në fjalë rezultojnë të regjistruara në emër të një subjekti privat, por hetimet kanë zbuluar se Veliaj dhe Xoxa kanë interesa të drejtpërdrejta mbi to.
Hetimi penal nr. 27 i vitit 2024 është regjistruar për një sërë veprash të rënda penale, përfshirë:
• Korrupsion pasiv dhe aktiv i funksionarëve të lartë dhe të zgjedhurve vendorë
• Pastrim i produkteve të veprës penale
• Fshehje, mosdeklarim ose deklarim i rremë i pasurisë dhe interesave private
• Deklarata të rreme përpara oficerëve të policisë gjyqësore
• Veprime që pengojnë zbulimin e së vërtetës
SPAK thekson se dyshimet ndaj çiftit janë të mbështetura në të dhëna konkrete të mbledhura gjatë hetimit paraprak, që tregojnë për përfshirje të mundshme në veprimtari të paligjshme të lidhura me burimin dhe administrimin e pasurive të tyre.
Masa e sekuestros, e vendosur me vendim të datës 22 maj 2025 nga Gjykata e Posaçme, synon të ruajë pasuritë objekt hetimi dhe të parandalojë çdo tentativë për t’i transferuar apo fshehur ato gjatë vijimit të hetimeve.
Kujtojmë se Erion Veliaj ndodhet në paraburgim që prej 10 shkurtit 2025, i dyshuar për përfshirje në nëntë raste të korrupsionit pasiv dhe pastrim parash në bashkëpunim.
Ndërsa ndaj Ajola Xoxës është caktuar masa e sigurimit personal “detyrim për t’u paraqitur” pranë autoriteteve, ndërkohë që hetimet për pasuritë dhe rrjetin e lidhjeve financiare të çiftit vijojnë.
