SPAK ka marrë në pyetje katër zyrtarë të Policisë së Shtetit, pas konstatimit të vizitave të tyre tek shefi i Qarkullimit Rrugor të Tiranës, Roven Zeka, ndërsa ky i fundit ndodhej nën arrest në Bllokun e Sigurisë.
Burime nga hetimi bëjnë me dije se vizitat janë zbuluar përmes kamerave të sigurisë, të sekuestruara nga BKH, ndërsa tre prej zyrtarëve kanë dorëzuar edhe celularët për ekspertizë.
Hetuesit dyshojnë se zyrtarët mund të kenë konsumuar elementë të veprës penale “shpërdorim detyre”, pasi kontakti me një person nën hetim është i ndaluar. Ndërkohë, përveç tyre, është sekuestruar edhe telefoni i një biznesmeni të njohur, për të zbardhur komunikime të mundshme komprometuese.
Roven Zeka u arrestua më 19 prill nga SPAK, së bashku me shefin e sektorit të Aksidenteve, Sokol Novaku, dhe oficerin e Policisë Gjyqësore, Edison Tabaku. Ata akuzohen për korrupsion në trajtimin e një aksidenti rrugor të ndodhur më 16 prill, ku mbetën të plagosur pesë persona.
Sipas dosjes hetimore, efektivët dyshohet se kanë marrë 2 mijë euro ryshfet nga një biznesmen, për të shmangur arrestimin e bashkëshortes së tij, e cila ishte në timon gjatë aksidentit.
Edhe pse zyrtarët pretendojnë se kanë ndjekur procedurën e zakonshme duke i referuar materialet në prokurori, SPAK dyshon për ndërhyrje të qëllimshme për të zbutur pasojat penale të ngjarjes.
Në seancën e zhvilluar më 22 prill, Zeka deklaroi se është oficer karriere dhe nuk ka pasur rol në ndonjë veprim të paligjshëm. Ndërsa për Sokol Novakun, kërkesa për masë më të butë sigurie u refuzua, pavarësisht pretendimeve për gjendje të rënduar familjare.
Tabaku, nga ana tjetër, akuzohet se ka kryer veprime të njëanshme në këtë rast, të panjohura nga eprorët e tij.
