SPAK ka realizuar një goditje të rëndësishme ndaj një organizate kriminale që përfshin individë të sistemit të drejtësisë, zyrtarë policie dhe dy gazetarë.
Në kuadër të operacionit janë urdhëruar gjithsej 18 arreste, ndër të cilët ndodhet edhe Marsel, i njohur gjithashtu si Bujar Shega, ambasador i dy kompanive të pastrimit Viola Green dhe Wonder Green.
Shega u arrestua në Milano, ndërsa hetimet zbuluan se kompania e tij ka fituar disa tendra për pastrimin e qyteteve.
Ai njihet për lidhje të forta në politikë dhe konsiderohet një figurë kyçe në pastrimin e parave për grupe kriminale, duke përfshirë një grup të fuqishëm me bazë në Dubai, i cili ka investuar në pasuri të paluajtshme në Tiranë.
Ky operacion, i cili është ende në vijim, ka zbuluar se Shega përdorte kompanitë e tij për të pastruar paratë e fituara nga aktivitete kriminale, duke i kanalizuar ato në investime dhe pasuri të paluajtshme.
Hetimet janë në zhvillim e sipër dhe pritet të dalin të dhëna të reja në lidhje me përfshirjen e më shumë individëve të njohur në këtë rrjet kriminal.
