Kryebashkiaku i Devollit, Eduard Duro, dhe katër zyrtarë të tjerë janë dërguar për gjykim nga SPAK, nën akuzën e “shpërdorimit të detyrës” për shkak të shkeljeve në dhënien e lejeve dhe autorizimeve për shoqërinë “Genci Petrol” sh.p.k.
Përveç Duro, janë të pandehur edhe Astrit Seferkolli, Gazmend Haxhija, Gazmend Mali dhe Vojsava Bregu.
Hetimet kanë zbuluar se në vitin 2015 dhe 2020, janë dhënë leje dhe autorizime për shoqërinë “Genci Petrol” për ndërtimin dhe operimin e një stacioni karburanti në Devoll, Kapshticë, pa dokumentacionin e duhur.
Sipas aktvendimit të Inspektoratit Kombëtar të Mbrojtjes së Territorit, në vitin 2019 ishte marrë vendim për prishjen e objektit të ndërtuar në mënyrë të kundraligjshme, ndërkohë që në momentin e dhënies së lejes dhe autorizimit, “Genci Petrol” nuk kishte as dokumentacionin përkatës, përfshirë aktin e kontrollit dhe autorizimin për hyrje-dalje nga rruga interurbane, që është një kërkesë ligjore për një objekt të tillë.
SPAK ka kërkuar që këta zyrtarë të përballen me akuzat dhe të gjykohen për shpërdorim detyre, duke theksuar shkeljet e bëra gjatë dhënies së lejeve dhe autorizimeve, që kanë ndikuar në ekonominë dhe sigurinë e territorit.
Nëse shpallen fajtorë, ata mund të përballen me dënime të rëndësishme për veprat penale të kryera.
