SPAK ka përfunduar hetimet dhe ka çuar për gjykim 17 persona, të akuzuar për organizimin e kalimit të paligjshëm të emigrantëve drejt vendeve të BE-së.
Sipas hetimeve, ky grup kriminal kishte krijuar një skemë të trafikut të qindra shtetasve nga Azia dhe Afrika, të cilët hynin në Shqipëri me kontrata pune fiktive dhe më pas largoheshin përmes rrugëve tokësore drejt vendeve të BE-së.
Dy prokurorët e çështjes, Elida Kaçkini dhe Altin Dumani, theksojnë në dosjen hetimore se grupi operonte përmes agjencive punësimi në Emiratet e Bashkuara Arabe, të cilat rekrutonin të rinj që synonin të punonin në Shqipëri, por në fakt kishin si destinacion final BE-në.
Agjencitë me seli në Tiranë, Vlorë dhe Durrës siguronin dokumentacionin për punësim fiktiv, duke përfshirë edhe subjekte të ndryshme në fushën e konfeksioneve dhe konservimit.
Nga viti 2023 deri në prill 2024, Shqipëria u përdor si vend tranziti për kalimin e paligjshëm të rreth 650 shtetasve nga Kameruni dhe Bangladeshi. Hetimet tregojnë se çdo anëtar i grupit kishte një rol specifik, duke nisur nga transporti i emigrantëve nga Dubai dhe Kameruni, pritja e tyre në Rinas, sigurimi i vizave dhe punësimi fiktiv në Shqipëri.
Më shumë se 15 kompani janë të përfshira në këtë skemë, nga një agjenci udhëtimi në Emiratet e Bashkuara Arabe deri te kompani në Shqipëri që lëshonin dosje të rreme punësimi.
Hetimet kanë zbuluar se edhe zyrtarë të policisë kufitare dhe emigracionit janë përfshirë në këtë skemë, duke lehtësuar kalimin e paligjshëm të emigrantëve përmes rrugës ballkanike: Shqipëri- Kosovë, Serbi, BE.
Akuzat e ngritura përfshijnë ndihmën për kalim të paligjshëm të kufirit, falsifikimin e dokumenteve dhe pjesëmarrjen në grup kriminal, bazuar në përgjime dhe vëzhgime ambientale të zhvilluara gjatë hetimeve.
