Ministrja e Shëndetësisë dhe Mbrojtjes Sociale, Ogerta Manstirliu ditën e sotme ka ndjekur nga afër procesin e vaksinimit në qendrën e re shëndetësore në Sarandë. Manastirliu është shprehur se kjo qendër shëndetësore, ofron shërbim për 44.000 qytetarët të Sarandës.
“Qendra shëndetësore në Sarandë, tashmë e rehabilituar me kushtet më të mira, falë programit të qeverisë shqiptare për rehabilimitimin dhe ndërtimin e 300 qendrave shëndetësore, ka ndryshuar tërësisht falë investimeve që ne kemi bërë, për infrastrukturën dhe për mbështetjen me të gjithë pajisjen e nevojshme. Kjo qendër ofron shërbime për më shumë se 44.000 qytetarë të Sarandës”, tha Manastirliu.
Nga Saranda ministrja e Shëndetësisë bëri me dije se ditën e sotme në vendin tonë do të mbërrijnë 50 mijë vaksina Pfizer. Gjithashtu ajo ka thënë se po vazhdojnë me njësitë e lëvizëse për të vaksinuar derë më derë çdo qytetarë i cili nuk ka mundësi që të shkojë në qendrat e përgjithshme të vaksinimit.
“Do të kemi mbi 50 mijë vaksina Pfizer që vinë sot dhe menjëherë do të shpërndahen në qendrat shëndetësore, në pikat tona të vaksinimit të përqëndruar por gjithashtu ne po vijojmë punën me njësitë lëvizëse për të vaksinuar derë më derë dhe për të vaksinuar në famije, për të vaksinuar qytetarët të cilët e kanë të pamundur që të lëvizin”, tha Manastirliu.
Manastirliu iu ka bërë apel të gjithë qytetarëve që janë mbi 18-vjeç të vaksinohen sa më parë. Gjithashtu një apel të veçantë ka edhe për studentët, të cilëve iu bën thirrje që të vaksinohen përpara fillimit të vitit të ri akademik.
“Ne jemi të angazhuar që të vijojmë gjatë muajit gusht me vaksinimin e grupmoshës +18 vjeç, duke ndalur fokusin tek të gjithë ata të cilët janë më të rrezikuar +50 vjeç, por gjithashtu duke synuar edhe studentët, ata të cilët duhet të jenë në auditore në vitin e ri, të jenë sa më të mbrojtur, për të bërë të mundur kufizimin e përhapjes së variantit Delta dhe gjithashtu për të ulur dhe për të reduktuar rastet e rënda dhe fatalitetet”, nënvizoi Manastirliu.
Kujtojmë se muaji gusht do të jetë muaj i hapur i vaksinimit për të gjitha qytetarët +18 vjeç, për të kryer vaksinën kudo në qendrat shëndetësore apo në pikat e vaksinimit të përqëndruar, ku secili mund të paraqitet me kartën e identitetit. Për të pamundurit, njësitë e lëvizshme të vaksinimit do të jenë kudo në territor për t’ju dhënë mundësinë e kryerjes së vaksinimit ndaj COVID19 të gjithë qytetarëve.
