Të dielën në Kosovë nis ushtrimi ushtarak shumëkombësh “Defender Europe 2025”, i organizuar nga Komanda e Ushtrisë Amerikane për Evropë dhe Afrikë.
Kjo është një nga stërvitjet më të mëdha ushtarake të NATO-s dhe aleatëve të saj, me qëllim forcimin e gatishmërisë dhe bashkëpunimit ndërkombëtar, si dhe mbrojtjen e kufijve lindorë të Aleancës.
Ministri i Mbrojtjes në detyrë, Ejup Maqedonci, bëri të ditur se Forca e Sigurisë së Kosovës do të marrë pjesë aktive në këtë stërvitje, ndërsa Kosova do të jetë vend pritës i Shtabit të Divizionit të 28-të të Ushtrisë Amerikane.
Po ashtu, në territorin e saj do të qëndrojnë edhe trupa të armatosura nga Shqipëria, Kroacia, Maqedonia e Veriut dhe Bullgaria.
Në “Defender Europe 2025” janë angazhuar gjithsej 25 mijë trupa nga 29 shtete. Ushtrimet do të zhvillohen në 18 vende evropiane, përfshirë Kosovën, Shqipërinë, Bullgarinë, Kroacinë, Çekinë, Finlandën, Greqinë, Hungarinë, Letoninë, Lituaninë, Malin e Zi, Maqedoninë e Veriut, Norvegjinë, Poloninë, Rumaninë, Sllovakinë, Slloveninë dhe Suedinë.
Për dy javët në vijim, Kosova do të jetë një nga qendrat kyçe të këtij aktiviteti ushtarak. Ministria e Mbrojtjes ka njoftuar se nga dita e hënë deri më 9 qershor do të ketë lëvizje të shumta konvojesh ushtarake nga vendbazimet e FSK-së drejt rajonit të Gjakovës, në veçanti në Aeroportin e Gjakovës dhe poligonin ushtarak në Babaj të Bokës.
Pjesëmarrja e Kosovës në këtë ushtrim konsiderohet një hap strategjik për fuqizimin e kapaciteteve të saj ushtarake dhe për afrimin me strukturat euroatlantike të sigurisë.
