Në orën 17:00 është planifikuar të zhvillohet mbledhja e radhës e Këshillit Politik, ku do të diskutohet ndryshimet kushtetuese për hapjen e listave dhe koalicionet parazgjedhore. Kryeministri Edi Rama do të jetë i pranishëm në takim, ndërkohë që i bën thirrje opozitës së drejtuar nga Lulzim Basha që të mos bojkotojë tryezën.
“Sot në 17:00 është propozuar nga ana jonë përmes Damian Gjiknurit mbledhja e Këshillit Politik. Përsëris apelin për OP jashtëparlamentare që të mos e bojkotojë Këshillin Politik dhe të vijojmë dialogun tripalësh së bashku me OP parlamentare, për reflektimet e risive kushtetuese”, shkruan Rama në një postim në Twitter.
PD, LSI dhe aleatët e tjerë kundërshtuan dje me forcë marrëveshjen e arritur midis Partisë Socialiste dhe opozitës parlamentare, duke e konsideruar zhbërje të marrëveshjes së 5 qershorit. Rama deklaroi dje se marrëveshja e 5 qershorit për kodin zgjedhor do të miratohet në Kuvend më 23 korrik, ndërsa më 30 korrik do të votohet marrëveshja për ndryshimet kushtetuese. Por sipas opozitës së bashkuar, vendimi i dytë rrëzon marrëveshjen e 5 qershorit.
