Olta Xhaçka dhe Niko Peleshi do të marrin sot votën formale të Kuvendit në detyrat e reja në kabinetin Rama. Xhaçka u dekretua nga Presidenti Ilir Meta si ministre të Jashtme dhe Niko Peleshi në krye të Ministrisë së Mbrojtjes. Firmosja e menjëhershme e dekreteve nga Presidenti Meta i zuri në befasi mazhorancën, pasi, zakonisht, presidenti ka ndjekur limitet e afateve për të firmosur aktet e Kuvendit. Kjo ka sjellë mbajtjen e një seancë të jashtëzakonshme të Kuvendit sot në orën 17:00.
Mbledhja është kërkuar nga kryeministri Edi Rama, i cili i ka dërguar një letër zyrtare kryetarit të Kuvendit, Gramoz Ruçi duke i kërkuar që të mbledhë ligjvënësit në një seancë të jashtëzakonshme, me qëllim shqyrtimin e dekreteve të shkarkimit dhe të emërimit të ministrave, brenda afatit të përcaktuar në pikën 2 të nenit 98 të Kushtetutës.
Kuvendi i Shqipërisë e nis sesionin e ri parlamentar më 18 janar, por emërimi i ministrave të rinj ka bërë që ajo të mblidhe 2 javë më parë në një seancë të jashtëzakonshme.
Emërimi i Otla Xhaçkës në krye të Ministrisë së Jashtme u bë pas dorëheqjes së Gent Cakaj, ndërsa është vlerësuar edhe nga ambasadorja Yuri Kim duke e konsideruar si një aleate të shkëlqyer.
Në vend të Xhaçkës është emëruar Niko Peleshi, i cili është rikthyer sërish në qeveri në postin e Ministrit të Mbrojtjes.
Rendi i ditës:
– Hapja e sesionit të jashtëzakonshëm të legjislaturës së IX të Kuvendit të Shqipërisë.
- Dekret i Presidentit të Republikës nr. 11.889, datë 31.12.2020 “Për shkarkim ministri”.
- Dekret i Presidentit të Republikës nr. 11.890, datë 31.12.2020 “Për shkarkim ministri”.
- Dekret i Presidentit të Republikës nr. 11.891, datë 31.12.2020 “Për emërim ministri”.
- Dekret i Presidentit të Republikës nr. 11.892, datë 31.12.2020 “Për emërim ministri”.
/Gazetareforma.com/
