Të gjithë ata që sot u është dashur të shkojnë në punë, kanë vënë re hapjen e bareve e restoranteve. Klientët e parë “kanë bërë këmbë” në baret më në fund të hapura, pas një pushimi më shumë se dy mujor.
Funksionimi i tyre do të jetë në bazë të rregullave strikte të publikuara nga qeveria.
Baret dhe restorantet do të duhet të respektojnë distancimin prej 2 metrash nga tavolina në tavolinë, duhen siguruar dezinfektues në hyrje të bareve për klientët si dhe një higjienë e mirë për vetë personelin e shërbimit që duhet të jetë i pajisur me maska e doreza.
Por ditën e sotme, hyjnë në fuqi një sërë masash lehtësuese për Covid-19 edhe pse frika për shtimin e numrit të infektuarve është e madhe.
Kryeministri Edi Rama njoftoi ditën e djeshme se nga sot qyteti i Fierit futet në zonën e gjelbër.
Në zonat e gjelbëra të gjithë qytetarët kanë mundësi lëvizje 24 orë të ditë, pa marrë asnjë autorizim.
Të gjithë qytetarët duhet të respektojnë rregullat e distancimit social.
Kryeministri njoftoi gjithashtu në rrjetin e tij social Facebook se tashmë lëvizja do të jetë pa autorizim deri në orën 21:00 të mbrëmjes.
Ndërkohë lëvizja mes zonave të kuqe dhe të gjelbëra nuk do të lejohet sërish, për të kufizuar sa më shumë përhapjen e COVID-19.
Nga ana tjetër, sot 31 mijë maturantë i rikthehen bankave të shkollës.
Shkollat janë të përgatitura me sinjalistikën e duhur, dezinfektues, postera informuese dhe garantimin e distancës së tavolinave.
Po kështu, të gjithë muzetë publikë, monumentet, si dhe sitet arkeologjike do të jenë të hapura si dhe lejohen edhe stërvitjet në grup.
Edhe përsa i përket masave në televizione, studiot do të jenë të hapura për më shumë se një person, por vetëm duke zbatuar masën e sigurisë 2 metra distancë nga njëri-tjetri.
Kujtojmë këtu rastin e pak ditëve më parë, ku emisioni i moderuar nga gazetarja Sonila Meço u gjobit me 10 milionë lekë të vjetra, pasi ka thyer rregullat mbi të ftuarit.
https://www.facebook.com/edirama.al/posts/10157772549116523
