Presidenti serb Aleksandër Vuçiç ka deklaruar se Serbia ishte në dijeni që mbrëmë se Prishtina po planifikonte lëvizje të forcave të saj në Kosovën veriore.
Vuçiç tha se kjo është një nga ditët më të vështira për serbët në Kosovë, ndërsa e cilësoi situatën serioze. Ai shtoi se snajperistë kanë mbuluar shtëpitë e të rinjve serbë që mund të kundërshtojnë veprimet e Kosovës.
“Sot është një nga ditët më të vështira për njerëzit tanë në Kosovë. Nuk bëhet fjalë për ndonjë dramatizim, por situata është vërtet serioze dhe e vështirë. Dua t’ju informoj se ne e dinim mbrëmë se Prishtina po planifikonte lëvizje të forcave të saj në Kosovën veriore”, deklaroi ai.
“Ata kaluan në Kosovën veriore rreth orës gjashtë të mëngjesit të sotëm, dhe kjo është hera e gjashtë që hyjnë atje. Snajpera janë vendosur në disa vende. Snajperistët kanë mbuluar shtëpitë e të rinjve serbë të cilët mund të kundërshtojnë veprimet e tyre të paligjshme”, ka thënë Vuçiç.
Ditën e sotme qeveria e Kosovës vendosi të zbatojë reciprocitetin në targa me Serbinë, duke e bërë detyrim për të gjitha veturat me regjistrim serb që hyjnë në vend, të paguajnë 5 euro në mënyrë që të pajisen me target e përkohshme “RKS”.
