Presidenti i Republikës, Ilir Meta është në pritje të informacioneve nga kompania telefonike pas denoncimit se mesazhet fyese e kërcënuese ishin dërguar në emrin e tij disa personave.
Lajmin e bëri të ditur zëdhënësi i Presidentit meta, Tedi Blushi i cili shkruan se sot Kreu i Shtetit iu drejtua me një kërkesë për informacion kompanisë telefonike, pasi sipas të dhënave të siguruara mesazhet e manipuluara janë dërguar nga qendra e mesazheve të kësaj kompanie. Blushi shkruan se Presidenti Meta është në pritje të informacionit të nevojshëm, para nisjes së procedurave ligjore në sistemin ndërkombëtar.“Sot, Presidenti i Republikës Sh.T.Z Ilir Meta ju drejtua me një kërkesë për informacion kompanisë “One Telecommunications” lidhur me keqpërdorimin kriminal të mesazheve telefonike, gjoja sikur janë dërguar nga numri i Tij personal zyrtar, në adresë të disa qytetarëve.Sipas të dhënave të siguruara, mesazhet e manipuluara, janë dërguar nga qendra e mesazheve të kësaj kompanie telefonike.Për këtë arsye, Presidenti Meta është në pritje nga “One Telecommunications” të informacionit të nevojshëm, para nisjes së procedurave ligjore në sistemin ndërkombëtar”, deklaron Blushi.
Kujtojmë se paraditen e ditës së sotme Partia Socialiste i ka drejtuar një letër Kreut të Kuvendit, Gramoz Ruçit, për shkarkimin e Presidentit të Republikës, Ilir Meta. Kërkesa drejtuar Ruçit mban firmën e 50 deputetëve të Kuvendit, të cilët kërkojnë shkarkimin e Presidentit. Deputetët e argumentojnë kërkesën e tyre se ka shkelur Kushtetutën para dhe gjatë fushatës zgjedhore të zgjedhjeve të 25 prillit.
Disa nga socialistët që kanë firmosur kërkesën janë Taulant Balla, Elisa Spiropali, Spartak Braho, Pandeli Majko, Olta Xhaçka, Eglantina Gjermeni, Ergys Çyrbja, etj.
