Fusha e mbetjeve urbane në Vlorë është përfshirë nga flakët, duke u kthyer në një alarm mjedisor. Flakët kanë nisur që prej orës 7:30 të mëngjesit të sotëm, ndërsa dyshohet për zjarrvënie të qëllimshme.
Në një prononcim për mediat kryetari i Bashkisë së Vlorës, Dritan Leli ka deklaruar se zjarri ka qenë i qëllimshëm, ndërsa shtoi se Landfilldi i Sheristës do ta zgjidhë çështjen.
“Masakër mund ta quanin 20 vjet që digjeshin plehrat dhe askush nuk ngrinte zërin, ndërsa sot mund ta quajmë një incident, policia po gjen shkaktarët, thuhet e qëllimshme, këtu për t’u përballur me këtë situatë për të cilën jam e sigurt se do e fitojmë, duke u përpjekur maksimalisht me zjarrfikëset që po punojnë. Landifili i Sheristës do zgjidhë çështjen kaq të nxehtë të trajtimit të mbetjeve në Vlorë, pavarësisht pengesave në horizont ekziston fryma pozitive. Që t’i vë gishtin dikujt, këtë ta gjejnë organet e policisë së Shtetit, ka qenë premtimi i parë për një plagë që e ka pasur qyteti, që po rikthehet në memorien e qytetarëve”, tha Leli.
Ndërkohë, banorët kanë hedhur akuza se zjarri mund të jetë vendosur nga vetë punonjësit e fushës së mbetjeve.
Ky rast nuk është i pari e as i vetmi, pasi një situatë e ngjashme me atë që po ndodh në Vlorë ishte edhe në Fier, Patos e Lushnjë.
Kujtojmë që në Fier flakët e mbetjeve në fushën urbane shkaktuan një ndotje të madhe dhe një re e madhe tymi mbuloi qytetin për disa ditë, duke vështirësuar jetën e përditshme të banorëve. Edhe në Lushnjë u përsërit e njëjta situatë, ku tymi mbuloi zonën dhe një erë e keqe përfshiu kryesisht lagjen “18 Tetori” të qytetit.
Ndërkohë, pas djegies së mbeturinave në Fier, zyrtarët vendor nisën bisedimet me përfaqësuesit e inceneratorit. E gjitha me qëllimin e përshpejtimit të procedurave për aktivizimin e inceneratorit, që kishte mbetur i harruar prej kohësh.
Nuk dihet nëse edhe në Vlorë është i njëjti skenar, por kujtojmë se disa ditë më parë në mbledhjen e Këshillit Bashkiak u kërkua që të diskutohej për shtimin e punonjësve në landfill. Kjo është një pikë kontraktuale (e përcaktuar në kontratën e bashkëpunimit mes qeverisë Gjermane dhe Bashkisë së Vlorës), me qëllimin që landfilli të fillojë punën.
Por Këshilli Bashkiak i Vlorës as që ka pranuar ta hedh në votim këtë çështje. Bashkia e Vlorës ka kontratë me Ministrinë e Financave dhe KVF gjermane për ndërtimin dhe vendosjen në funksion të Landfillit të Vlorës (në disa faza). Sipas kontratës, është bashkia ajo që i mbulon pagat e punëtorëve. Që në muajin prill, qeveria gjermane ka kërkuar shtim të numrit të punonjësve me qëllim trajnimin e tyre. Vendimi për këtë çështje u shty për shkak të pandemisë.
Për ndërtimin e landfillit është marrë kredi nga bankës gjermane KfW. Tenderi për ndërtimin e tij kapte vlerën 9.8 milionë euro.
Qeveria ka marrë 21 milionë euro financim, një kredi me vlerë 12,5 milionë euro nga Banka Federale Gjermane (KFW), si dhe dy grante të jashtme me vlerë 7,5 dhe 1,3 milionë euro ndërtimin e landfillit dhe përpunimin e ujrave të zeza të Vlorës. Kujtojmë që tenderi u fitua nga Intergrated Technology Services. Kompania është në pronësi të Klodian Zotos, i cili ka monopolin e ineneratorëve dhe landfilleve në vend.
