Ministria e Arsimit ka ndërruar mendje për skemën se si duhet të aplikojnë maturantët për në universitet.
Para 4 javësh u publikua një udhëzim i cili pakësonte mundësitë e maturantëve për zgjedhjen e degëve për në universitet, por tani pas 4 javësh ky udhëzim është rrëzuar duke lënë në fuqi procedurën e mëparshme.
Në udhëzimin e firmosur nga Besa Shahini më datë 23 qershor, thuhet se maturantët në raundin e dytë të aplikimeve do të përzgjedhin 10 degë, e jo më 7 siç vendosi më parë. E njëjta gjë do të ndodhë edhe me raundin e tretë ku tashmë do të aplikojnë sërish për 10 degë e jo për 5.
Pasi publikohen listat me emrat e fituesve nga degët e përzgjedhura, për maturantët nis regjistrimi në universitet, por përmes disa fazave. Në udhëzimin e datës 26 maj ministria vendosi që në raundin e pare të kishte 6 faza 48-orëshe, ndërsa me udhëzimin e ri do të ketë 7 faza 48-orëshe, ashtu siç ka qenë edhe vitin e kaluar. Në raundin e dytë do të ketë sërish 5 faza 48-orëshe ndërsa raundi i tretë do të vijojë me 3 faza 48-orëshe.
E vetmja gjë që nuk ka ndryshuar nga udhëzimi i datës 26 maj është pika e plotësimit të kuotave të lira.
Tani u është lënë në dorë vetë universiteteve që të përshtasin kuotat e deklaruara.
Që do të thotë se kuotat e paplotësuara në përfundim të raundit të pare për çdo program studimi do të mund të kalohen në programe të tjera sipas kërkesave. Gjithçka do të bëhet duke njoftuar ministrinë e arsimit.
“Kuotat e paplotësuara në përfundim të raundit të parë për çdo program studimi mund të përshtaten nga IAL-të në programe të tjera studimi të të njëjtit cikël të ofruara brenda së njëjtës njësi kryesore, pa kaluar totalin e kuotave për njësi kryesore, dhe njofton zyrtarisht MASR për vendimin e senatit akademik mbi përshtatjen e kuotave të programeve të studimit. Në rast se përshtatja e kuotave është sipas përcaktimeve ligjore, MASR njofton IAL-të, RASH dhe QSHA për konfirmimin e përshtatjen së kuotave”, njofton Ministria.
