Një skemë e madhe mashtrimi është zbuluar në Shtetet e Bashkuara të Amerikës ku persona me një pozitë të veçantë kanë dhënë ryshfet për të bërë të mundur pranimin e fëmijëve të tyre kolegjet më prestigjioze.
Bëhet fjalë për prindër të famshëm të Holliwood-it, trajnerë dhe administratorë të një universiteti, të cilët në total bëhen 50 të akuzuar tashmë.
Prokurorët e kanë quajtur këtë si skemën më të madhe të këtij lloji, që është ndjekur ndonjëherë nga Departamenti i Drejtësisë.
Ajo çfarë është zbuluar deri tani është se një person me emrin William Rick Singer, ka realizuar provime të rreme, kredenciale të rreme dhe arritje të rreme në sporte, njoftoi Departamenti i Drejtësisë të martën në një konferencë shtypi.
Prindërit e akuzuar, përfshijnë aktorët Felicity Huffman dhe Lori Laughlin. Ata akuzohen se u kanë paguar me qindra mijëra dollarë për të siguruar që fëmijët e tyre të pranoheshin në kolegje prestigjioze amerikane – si universitetet Yale, Stanford, Georgetown – pa pasur kredencialet ose aftësitë e kërkuara.
“Këtu nuk po flasim për dhurimin e një ndërtese,” shpjegoi prokurori Andrew Lelling. “Po flasim për marrje ryshfetesh nga zyrtarët e kolegjit”.
Një akuzë përfshin kreun e futbollit për femra në Universitetin Yale, që zyrtarët e drejtësisë thonë se ka pranuar 400,000 dollarë, për të siguruar pranimin e një studenteje. Më vonë, sipas akuzës, ai ka marrë një shtesë prej 1.2 milionësh nga prindërit e vajzës për këtë qëllim. Në disa raste, tha prokurori, Singer bashkëpunoi me prindërit “për të krijuar profile atletike mbresëlënëse për fëmijët e tyre”, duke përfshirë pjesëmarrje të rreme në ekipet elitë.
