Një tjetër aferë shqetësuese është zbuluar në Spitalin Onkologjik të Qendrës Spitalore Universitare “Nënë Tereza” në Tiranë, ku një skemë abuzive e lidhur me laboratorin e biopsisë po ndikon drejtpërdrejt në trajtimin e pacientëve me kancer.
I konsideruar si institucioni i vetëm publik në vend që ofron trajtim dhe analiza të specializuara për sëmundjet kancerogjene, Onkologjiku duket se po shfrytëzon pikërisht nevojën jetike të qytetarëve për të ushqyer praktika korruptive. Sipas një denoncimi të bërë publik nga gazetari Osman Stafa, në këtë spital është ngritur një skemë e mirëorganizuar që përfshin drejtues të laboratorit të biopsisë dhe rrjete të laboratorëve privatë.
Denoncimi ka ardhur nga vetë qytetarët e prekur dhe familjarët e pacientëve, të cilët tregojnë se analizat e nevojshme për diagnostikimin e kancerit nuk kryhen në ambientet publike, por referohen në mënyrë të dyshimtë drejt laboratorëve privatë. Ata ngrenë pikëpyetje serioze mbi motivet që fshihen pas kësaj praktike dhe përfituesit realë të saj.
“Biopsia është një analizë thelbësore për të nisur trajtimin. Kur na thonë se duhet bërë në privat, jemi të detyruar të paguajmë. A nuk është ky një shantazh mbi jetën?”, shprehet një familjar.
Përmes këtij mekanizmi, pacientët ose të afërmit e tyre udhëzohen të shkojnë në laboratorë të caktuar, duke lënë të kuptohet se këto institucione private janë në bashkëpunim të drejtpërdrejtë me individë brenda sistemit shëndetësor publik. Ndërkohë, shteti vazhdon të paguajë për ekzaminime që, në praktikë, nuk kryhen në strukturat publike për të cilat janë ndarë fondet përkatëse.
Skandali hedh dritë mbi një realitet të hidhur ku betimi i Hipokratit vihet në pikëpyetje dhe ku e drejta për kujdes shëndetësor barazohet me mundësinë financiare për të shmangur referimin tek privatët.
Në kushtet kur sëmundjet tumorale janë në rritje dhe çdo ditë sjellin humbje jete, ky denoncim shton trysninë për hetim të menjëhershëm institucional. Qytetarët kërkojnë transparencë dhe drejtësi: Kush i dërgon pacientët në privat? Dhe më e rëndësishmja, kush përfiton nga kjo skemë?
Autoritetet shëndetësore dhe institucionet ligjzbatuese pritet të reagojnë, ndërsa ky rast vë në qendër të vëmendjes nevojën për reformë reale në sistemin e kujdesit shëndetësor publik.
