Skandali i bërë publik për bllokimin e pasaportave shqiptare në Kakavije dhe humbjen e 100 prej tyre në Greqi ka sjellë edhe reagimin e Ministrisë për Evropën dhe Punët e Jashtme. Në deklaratën publike, ministria e pranon bllokimin dhe humbjen e pasaportave në territorin grek, por mesa duket s’do të mbajë asnjë përgjegjësi për të.
Madje në një fjali thuhet: “Në datë 13 shkurt, pasaportat e prodhuara nga kompania ALEAT po transportoheshin drejt Greqisë të ambalazhuara jo në përputhje me praktikat e rregullta të transportimit të pakove diplomatike”. Kështu që normalisht dogana greke do t’i bllokonte ato, pasi nuk kishin sesi të kalonin brenda territorit duke mos pasur asnjë mjet sigurie të mundshme.
“Pako me pasaportat shqiptare, u zhbllokua pas verifikimit të tyre dhe takimit të përfaqësuesve të Konsullatës së Përgjithshme të RSH-së në Janinë me autoritetet doganore greke. Theksojmë se ngarkesa ka qenë e shoqëruar me një dokumentacion autorizues të Ambasadës së Republikës së Shqipërisë në Athinë, me anë të të cilit autorizohej një punonjëse e Kompanisë “Top Lines” të dorëzonte aplikimet dhe të tërhiqte pasaportat dhe kartat ID pranë Kompanisë ALEAT, për llogari të Ambasadës sonë në Athinë. Dërgesa i është dorëzuar përfaqësuesve diplomatikë të Konsullatës së Përgjithshme të Republikës së Shqipërisë në Janinë, të cilët kanë proceduar me shoqërimin dhe transportin e tyre drejt Ambasadës së Republikës së Shqipërisë në Athinë. Gjatë transportimit të tyre nga Konsulli i Përgjithshëm i Republikës së Shqipërisë në Janinë, në një nga ndalesat e bëra për në ambasadën tonë, pikërisht në rrugën Agion Asomaton të lagjes Thisio, Athinë, prej orës 22.50 deri në orën 00.10, automjeti me targa diplomatike u vandalizua”,- sqaron MPJ.
Gjithashtu në deklaratë thuhet se personat përgjegjës do të ndëshkohen për veprimin e bërë, mirëpo nuk përmendet asgjëkundi se çfarë do të bëhet me 100 pasaportat tashmë të humbura.
Po ashtu thuhet se të gjithë qytetarët e prekur nga dëmi i shkaktuar do të ri-aplikojnë pa shpenzime dhe lëshimi i pasaportave të reja do të bëhet me urgjencë.
“Ministria e Brendshme në bashkëpunim me kompaninë ALEAT, kanë marrë masat për nxjerrjen jashtë përdorimi dhe shpalljen e pavlefshme të këtyre pasaportave, si dhe angazhimin për të përshpejtuar procedurat e riprodhimit dhe zëvendësimin e tyre”,- sqarohet më tej.
