Deputeti i Partisë Demokratike, Flamur Noka, i përjashtuar nga seanca plenare pasi i fryu bilbilit në seancën e kaluar, pasi nuk është lejuar të hyjë në kuvend i është bashkuar protestës që po mbahet para Parlamnetit. Noka në fjalën e tij para mbështetësve të opozitës deklaroi se Edi Rama është i kapur në flagrancë me skandalin e fundit. Sipas tij deputetët e PD-së po kërkojnë të përcjellin zërin e qytetarëve në seancë, gjë për të cilën janë votuar dhe ky zë po ndalohet nga mazhoranca.
Sipas tij, skandali Rama-McGonigal, është skandali më i madh, gjesti më antiamerikan që mund të kishte realizuar një qeveri që pas prishjes së marrëdhënieve me SHBA nga Enver Hoxha.
“Edi Rama është i kapur peng, është i kapur në flagrancë. Po kërkojmë të drejtën për të folur. Një e drejtë që është fituar në dhjetorin e vitit 1990. Ne po kërkojmë të përcjellim zërin tuaj këtu dhe ky zë po ndalohet.
Ku është thelbi i këtij poshtërimi që Edi Rama po i bën parlamentarizmit. Ai u kap në një veprim kundër partnerit tonë strategjik, skandali Rama-McGonigal, është skandali më i madh, gjesti më antiamerikan që mund të kishte realizuar një qeveri që pas prishjes së marrëdhënieve me SHBA nga Enver Hoxha. Pas Enver Hoxhës, Edi Rama është antiamerikani më i madh që ka njohur historia”, deklaroi Noka.
