Pas skandalit të publikuar në mediat shqiptare ku rrjeti i dyqaneve “KFC” në Shqipëri është duke rrezikuar jetën e konsumatorëve pasi po përdor në produktet e tyre plot 1357 kg mish pule të infektuar me bakterin e salmonelës ,vjen një tjetër skandal në lidhje me këtë çështje.
AKU në njoftimin zyrtar të saj për këtë skandal nuk publikon fotot e kapjes së mishit së pulës me pretendimin se sistemi “RASFF” i BE-së nuk i ka dërguar foto.
Kjo përgjigje qesharake nuk është aspak serioze për një autoritet siç ishte ai i sigurisë ushqimore, pasi inspektorët që kanë bllokuar sasinë e mishit të pa shitur sigurisht që e kanë dokumentuar me foto ose përndryshe janë në shkelje me ligjin e duhet të pushohen nga puna që edhe kjo do të sillte një tjetër skandal në listën e gjatë të AKU-së.
Gjithashtu ky organ i cili duhet të shërbejë si mbrojtës i konsumatorëve nuk ka publikuar pikat shitëse se ku ky rrjet ushqimor ka shitur ose përdorur mishin e pulës të infektuar me salmonelë. AKU ka detyrim ligjor që të informojë median dhe qytetarët në lidhje me asgjësimin e sasisë së mbetur të mishit, por çuditërisht kjo nuk po realizohet e arsyet mbeten të paqarta. Fakti është se 1357 kg mish pule të infektuar me bakterin e salmonelës iu shit qytetarëve, ndërsa 177.12 kg thuhet se u asgjësuan, por edhe për këtë veprim nuk ka asnjë foto nga AKU.
AKU shprehet se asgjësimi është bërë në datë 30.8.2024, por nuk na vë në dispozicion asnjë foto ose video që ta faktojë se kjo procedurë është kryer. Çdo procedurë asgjësimi faktohet me foto edhe video ose në të kundërt quhet shkelje.
Pyetja që ngrihet a është asgjësuar me të vërtetë mish pule i infektuar me bakterin e salmonelës e nëse po, përse AKU e shmang detyrimin ligjor dhe nuk ia vendos në dispozicion medias dhe publikut?
