Një tjetër produkt i rrezikshëm ushqimor ka hyrë në tregun shqiptar, këtë herë me emrin “Red Forest Fruit Cake”, një pluhur për ëmbëlsira me origjinë nga Turqia.
Autoriteti Kombëtar i Ushqimit ka bllokuar vetëm 365 kg nga gjithsej 1.200 kg të këtij produkti, ndërkohë që 835 kg të tjera janë konsumuar tashmë nga qytetarët.
Alarmi u dha nga sistemi europian për sigurinë ushqimore RASFF, i cili sinjalizoi praninë në këtë produkt të pigmentit të ndaluar “e kuqe reaktive 141”, një substancë që përdoret për ngjyrosjen e tekstileve dhe që ndalohet rreptësisht për përdorim në produkte ushqimore apo kozmetike.
Substanca është klasifikuar si me rrezik të lartë për shëndetin, me pasoja që mund të shkojnë deri në kancer, dëmtime nervore apo çrregullime hormonale.
Ky nuk është rasti i parë që AKU gjendet në qendër të një skandali ushqimor. Nga mishi i pulës me salmonelë, filetot e kontaminuara, veza të rrezikshme për fëmijët, deri te akulloret me substanca kancerogjene e produktet e përditshme me pesticide, lista e produkteve të pasigurta që qarkullojnë në treg është gjithnjë e më e gjatë. Megjithatë, në asnjë rast nuk ka pasur dënime penale, mbyllje kompanish apo shkarkime zyrtarësh.
Një nga rastet më të rënda ndodhi në Gramsh, më 20 maj, ku 17 fëmijë të një kopshti publik u helmuan, sipas AKU-së, nga vezë të kontaminuara me salmonelë.
Vezë për të cilat ishin dhënë alarme më herët, por që institucionet vendosën t’i injoronin. Kopshti nuk u mbyll menjëherë, ngjarja nuk u raportua zyrtarisht dhe prindërit u njoftuan në mënyrë jozyrtare. Vetëm kur rasti u bë publik në media, AKU doli me një deklaratë “standarde” dhe mori masa pas faktit.
Skandali i pluhurit të ëmbëlsirave me pigment toksik është vetëm vazhdimi i një historie të njohur: një institucion që reagon pas dëmit, jo për ta parandaluar atë.
Rastet e herbicideve dhe pesticideve në fruta e perime, mishi me parazitë, dhalla dhe qumështi i prishur, janë pjesë e një zinxhiri dështimesh që rrezikon përditë jetën e qytetarëve.
Ndërsa Ministria e Bujqësisë dhe drejtuesit e AKU-së qëndrojnë në heshtje, qytetarët përballen me një treg që shpesh është më i rrezikshëm se i dobishëm. Mungesa e kontrolleve reale, mungesa e ndëshkimeve dhe lidhjet e dyshuara me interesat e bizneseve tregojnë se siguria ushqimore është braktisur në emër të përfitimeve.
Në këtë situatë, reagimi qytetar është e vetmja mënyrë për të kërkuar ndryshim. Bojkoti i produkteve të pasigurta, refuzimi i kompanive që nuk garantojnë standardet dhe presioni ndaj institucioneve për të bërë detyrën, janë hapat e parë drejt mbrojtjes së shëndetit publik.
