Kryetari i AKR-së, Behgjet Pacolli ka reaguar sërish për ngjarjen e rëndë që ndodhi në Kosovë, ku Naim Murseli planifikoi vrasjen e gruas së tij, Liridonës.
Pacolli tha se situatën e krijuar mes tij dhe ish-këshilltarit të tij, Naimit, mediat dhe analistët po e përdorin shumë keq.
Ai përmes një postimi në rrjetet sociale tha se kjo është një sjellje skizofrenie, pAsi kjo tragjedi e rëndë po përdoret për klikime dhe për t’i prishur reputacionin atij.
“Nga distanca shoh disa insinuata të individëve me sjellje skizofrenike që përdorin tragjedi si kjo e Liridonës për të tërhequr vëmendjen e publikut dhe për të pervetësuar ndonjë pëlqim (like) në platformat mediatike. Është e rëndësishme të ekspozohen dhe të kundërshtohen deklaratat e paqëndrueshme, pa fakte dhe të pasakta të disa “debatuesve” apo “analistëve” që njollosin imazhin dhe reputacionin e të tjerëve. Kjo do të ndihmojë në ngritjen e nivelit të bisedës dhe transparencës së informacionit për publikun dhe seriozitetin e vetë medias. Për ta sqaruar publikun, jam duke ndjekur një rrugë të gjatë dhe të planifikuar 6 muaj më parë, e cila më ka penguar të marr pjesë në varrim (për ç’ka janë kujdesur vëllezërit, familja dhe bashkëpunëtorët e mi)”, ka shkruar Pacolli.
