Italia në orët e fundit është përfshirë nga zjarre masive në rajonet qendrore dhe jugore. Situata atje paraqitet kritike, ndërsa në tentativë për t’u shpëtuar flakëve kanë humbur jetë edhe dy persona. Sipas burimeve zyrtare kanë ndërruar jetë një 53-vjeçare dhe nipi i saj 34-vjeç në qytezën e San Lorenzos në Kalabri.
Në Siçili nga ana tjetër është shpallur gjendja e emergjencës për 6 muaj. Krerët e vendit janë shprehur se me dhjetëra vatra zjarri po përhapen me shpejtësi, duke rrezikuar qindra banesa e pyje. Temperaturat mbi 40 gradë Celcius dhe moti i thatë i favorizojnë flakët të përhapen më shpejtë, ndërsa forcat zjarrfikëse lokale nuk janë të mjaftueshme për t’i bërë ballë një përhapje në këtë masë.
Ndërsa gjendja e emergjencës civile e cila do të zgjasin për 6 muaj, u përcaktua për të menaxhuar më mirë edhe pasojat që kanë lënë zjarret, flakët e të cilit kanë shkrumbuar pasuritë natyrore pyjore, qindra banesa e ndërtesa, shumë prej të cilave edhe me vlera historike.
Vatra zjarri aktive ka edhe në Sardenjë, Kalabri, Abruco e Emilia Romanja. Shkencëtarët thonë se situata është më e rënda e dekadave të fundit, pasi po vihet re fenomeni i përparimit të shpejtë të flakëve që po lëvizin me 3 kilometra në orë, një ritëm shumë i lartë. Ata thonë se e gjitha kjo është pasojë e ngrohjes globale.
