Situata e pandemisë vazhdon të paraqitet e rëndë në spitalet COVID të vendit tonë. Më alarmante duket të jetë gjendja në spitalin Infektiv, ku ambulancat sjellin pa pushim pacientë. Rreth mesditës së sotme situata është rënduar mjaft, edhe pse paraditja ka qenë e qetë. Nga raportimi i gazetarit të News 24, Erion Skëndo mësohet se nga ora 11:00 e deri në orën 16:30 në Infektiv kanë mbërritur 26 autoambulanca, që do të thotë se në çdo 13 minuta ka arrdhur një autoambulancë.
Edhe më e rënduar ka qenë gjendja rreth orës 13:30, kur në vetëm 30 minuta kanë mbërritur 7 autoambulanca. Spitali Infektiv ka një mbingarkesë të madhe pasi aty shkojnë urgjencat e Tiranës dhe të qyteteve të jugut.
Kujtojmë që ditë më parë u raportua se spitali COVID 2(Sanatoriumi) nuk do të pranonte më pacientë pasi ishte plotësuar numrii shtreterve. Ndërkohë, ka nisur edhe hapja e spitaleve COVID nëpër rrethet e Shkodres dhe Durresit për të përballuar numrin e shtuar të rasteve. Më tej pritet që të hapen edhe spitalet COVID në Elbasan, Vlorë e Gjirokastër.
Vetëm në 24 orët e fundit në vendin tonë janë raportuar 1075 raste të reja me koronavirus, ndërsa 18 persona ka humbur jetën. Numri i rasteve vazhdon të mbetet i lartë ditë pas dite, teksa procesi i vaksinimit po ecën me ritme mjaft të ngadalta.
