Në konferencën për shtyp që kryeministri Rama mbajti sot, ndër të tjera u pyet edhe për raportet me kryeministrin e Kosovës Albin Kurtin dhe nëse është planifikuar ndonjë takim mes tyre.
Ai u shpreh se mes tyre nuk ka asnjë telenovelë në lidhje me marrëdhëniet e tyre, pasi secili është sovran në qëndrimet e veta.
“Qëndrimet e mia janë qëndrimet e mia, qëndrimet e Albinit janë qëndrimet e Albinit. Albini është sovran në detyrën e tij, unë jam sovran të të drejtën time për të pasur qëndrimet e mia. Kaq! Nuk shoh asnjë problem këtu, nuk shoh asnjë telenovelë.
Për mua nuk ka pasur, s’ka dhe nuk ka për të pasur dyshim se kur njerëzit duhet të takohen, duhet të takohen dhe kur duhen ftuar, duhen ftuar. Të tjerat pastaj janë telenovela mediatike”, u shpreh kryeministri Rama.
Kujtojmë që pas tensioneve në veri të Kosovës dhe qëndrimit të Ramës, pati një ‘ftohje’ të marrëdhënies midis dy vendeve.
