Gjykata e Apelit ka shtyrë dhënien e vendimit për Mario Përlleshajn, të dënuarin për vrasjen e 14-vjeçarit Martin Cani. Shkak për shtyrjen është bërë mungesa e një prej anëtarëve të trupës gjyqësore.
Mario Përlleshaj u dënua më 9 dhjetor 2025 me 16 vite burg për vrasjen e Martin Canit dhe tentativën e vrasjes ndaj shokut të tij, Luis Meçe.
Ngjarja e rëndë ndodhi më 18 nëntor 2024, rreth 200 metra larg shkollës Shkolla Fan S. Noli në Tiranë. Sipas hetimeve, konflikti mes dy adoleshentëve kishte nisur tre ditë më herët brenda ambienteve të shkollës për motive të dobëta.
Ditën e ngjarjes, dy të miturit u përplasën fillimisht në tualetet e shkollës, ku debatuan ashpër dhe u ndanë nga roja i sigurisë. Pas përfundimit të mësimit, të shoqëruar nga miqtë e tyre, ata u takuan sërish pranë shkollës, ku konflikti degjeneroi në përleshje fizike.
Si pasojë, Martin Cani humbi jetën, ndërsa Luis Meçe mbeti i plagosur. Çështja tashmë mbetet në pritje të vendimit të Gjykatës së Apelit për autorin e krimit që tronditi opinionin publik.
