Shqipëria renditet në fund të listës së vendeve europiane përsa i përket pagës minimale, sipas të dhënave më të fundit të publikuara nga Eurostat. Aktualisht, paga minimale në vend është 40 mijë lekë, duke mos e kaluar asnjë nga 48 shtetet e tjera europiane të përfshira në raportim.
Edhe pse gjatë vitit 2023 u regjistrua një rritje prej 6 mijë lekësh, kjo shtesë nuk ka mjaftuar për të kompensuar rritjen e vazhdueshme të kostove të jetesës. Eurostat thekson se paga minimale në Shqipëri është plot gjashtë herë më e ulët se ajo e Luksemburgut, vendi me nivelin më të lartë të këtij treguesi në kontinent.
Situata bëhet më shqetësuese kur merret parasysh se më shumë se 25% e punonjësve shqiptarë marrin pagë minimale, e cila ka një fuqi blerëse shumë të kufizuar për shkak të rritjes së çmimeve, veçanërisht në kategorinë e produkteve të domosdoshme.
Të dhënat e Eurostat tregojnë gjithashtu se familjet shqiptare kanë përqindjen më të lartë të shpenzimeve për ushqime në Europë, një tregues i qartë i nivelit të lartë të varfërisë dhe mungesës së fuqisë ekonomike për të përballuar nevojat bazë.
Në kushtet e një presioni në rritje për përmirësimin e standardeve të jetesës, si mazhoranca ashtu edhe opozita kanë premtuar se paga minimale do të arrijë në nivelin e 500 eurove në fillim të vitit 2026.
