Shqipëria digjet, Rama premton avionë për dimër: Satelitët dhe premtimet e vjetra u bënë hi

Edhe një verë tjetër. Edhe një valë zjarresh. Edhe një dalje publike e Edi Ramës me premtime të reja.

Këtë herë njoftoi se Shqipëria do të blejë tre avionë zjarrfikës, të cilët do të mbërrijnë… në fund të vitit.

Pra, në nëntor ose dhjetor.

Kur sezoni i zjarreve të ketë mbaruar.

Kur pyjet, kullotat, bizneset dhe banesat që do të digjen këtë verë të jenë bërë hi.

Është ironike. Për dimrin do të jemi të pajisur. Nëse ndonjëherë dëbora merr flakë, avionët më në fund do të jenë gati për aksion.

Por pyetja nuk është pse po blihen avionë.

Pyetja është pse Shqipëria po hyn edhe këtë verë pa ta, megjithëse premtimi është bërë prej vitesh.

Sepse nuk është hera e parë.

Në verën e kaluar u tha se Shqipëria do të kishte në dispozicion dy avionë zjarrfikës gjatë sezonit. Më pas u fol për flotë ajrore, për monitorim modern, për dronë, kamera termike dhe sisteme inteligjente.

Sot nuk kemi as dy avionët e premtuar.

Sot dëgjojmë për tre të tjerë.

Për vitin tjetër.

Po satelitët?

Miliona euro u shpenzuan për satelitët.

Na u tha se “sytë do t’i çonim në qiell”. Se territori do të monitorohej në kohë reale. Se teknologjia do të zëvendësonte kontrollin me sy. Se policia dhe institucionet do të kishin informacion të menjëhershëm.

Rezultati?

Shqipëria vazhdon të zbulojë zjarret kur tymi është bërë i dukshëm për banorët.

Ku janë alarmet e hershme?

Ku është monitorimi satelitor?

Ku janë rezultatet konkrete të atyre miliona eurove?

Sepse qytetarët nuk kanë parë asnjë ndryshim në terren.

Edhe këtë vit pamjet janë të njëjtat.

Zjarrfikës që luftojnë me mjete të kufizuara.

Bashki që kërkojnë ndihmë nga njëra-tjetra.

Helikopterë të huaj që vijnë kur situata përkeqësohet.

Ndërkohë, qeveria gjeti miliona euro nga fondet publike për organizimin e koncertit të Kanye West.

Pra, kur bëhet fjalë për spektakël, fondet gjenden.

Kur bëhet fjalë për mbrojtjen e pyjeve, banesave, ekonomisë dhe jetës së njerëzve, dëgjojmë se duhet të presim edhe disa muaj.

Kjo nuk është mungesë parash.

Është çështje prioritetesh.

Sepse një paketë bazë për Shqipërinë nuk kërkon qindra miliona euro.

Vetëm dy avionë të përdorur të tipit AT-802 Fire Boss, një helikopter sezonal me qira, automjete ndërhyrjeje, autobote, pajisje moderne për zjarrfikësit, radio digjitale, dronë me kamera termike, pika vrojtimi dhe një qendër kombëtare koordinimi do të kushtonin rreth 8 deri në 10 milionë euro.

Shumë më pak sesa dëmet që shkakton çdo sezon zjarresh.

Shumë më pak sesa fondet që shpesh shpërndahen për aktivitete propagandistike.

Çdo verë skenari përsëritet.

Në dimër premtohen reforma.

Në pranverë flitet për gatishmëri.

Në verë digjen pyjet.

Në fund të sezonit shpërndahen falënderime, dekorata dhe bonuse.

Pastaj gjithçka harrohet.

Deri në verën tjetër.

Dje kryeministri tha se “një vend nuk mbrohet nga ligjet dhe muret, por nga njerëzit”.

Është e vërtetë.

Por njerëzit nuk mbrojnë dot një vend pa mjete.

Zjarrfikësit nuk mund të luftojnë flakët vetëm me guxim.

Heroizmi nuk zëvendëson avionët.

Sakrifica nuk zëvendëson teknologjinë.

Duart nuk zëvendësojnë logjistikën.

Dhe propaganda nuk shuan zjarret.

Shqipëria nuk ka nevojë për një premtim të ri çdo verë.

Ka nevojë që premtimet e vjetra të mos mbeten më vetëm fjalë.