Nxënësit e shkollës 9-vjeçare :Avni Rustemi” në Libohovë, shpëtuan mrekullisht ditën e hënë, pas defektit në sistemin ngrohës.
Gazi i kaldajës shpërtheu, duke u përhapur në të gjithë shkollën.
Fëmijët u zhvendosën menjëherë në palestrën e shkollës, por pas dy orësh i janë rikthyer sërish mësimit.
Asnjë nga institucionet nuk ka reaguar në lidhje me këtë ngjarje.
Nuk dihet se me çfarë sigurie nxënësit janë kthyer në mësim.
Drejtoresha e shkollës, Vjollca Idrizi, tha për “Report Tv”, se nuk pati rrezik hspërthimi.
“Nuk ishte në situatë shpërthimi, era e gazit që u hap ditën e hënë ishte pasojë e një manovre që bëhet tek depozita e kaldajës që u fut në ambientin e shkollës, por nuk kishte rrezik shpërthimi nxënësit ishin jashtë se nuk kishte filluar mësimi. Qëndruan në palestrën e shkollës jashtë duke luajtur, ndërkohë orën e dytë filloi mësimi normalisht”, tha drejtoresha.
Përsa i përket kaldajave, drejtoresha tha se defekti u raportua në bashki, dhe që prej ditës së djeshme funksionojnë normalisht.
Mirëpo fëmijët kanë dhënë një version tjetër, ata shprehen se nuk kanë me çfarë të ngrohen dhe orët mësimore i zhvillojnë të veshur me xhup.
“Kishte erë gazi dhe ne dolëm përjashta, u trembëm pak. Nuk ngrohemi tani, ngroheshim me kaldaja po ato u prishën. Është pak e vështirë të bësh mësim. Ditën e djeshme kur erdhën në shkollë mbante pak era gaz, dolëm jashtë dhe më vonë u futëm prapë në shkollë për të bërë mësim. Tani nuk ngrohemi me asgjë momentalisht. Kaldajat kanë funksionuar këtë vit. Mbante shumë erë gaz dhe dolëm jashtë deri nga ora 10:00. U trembëm pak. Tani në shkollë nuk ngrohemi me asgjë. Është ftohtë, nuk i kemi hequr xhupat”, thanë nxënësit.
Ngrohja me kaldajë ishte pjesë e investimit të Bashkisë së Libohovës për rikonstruksionin e shkollës me vlerë 600 milion lekë.
Kryetarja e Bashkisë, Luiza Mandi nuk është prononcuar ende në lidhje me këtë rast.
