Olti Dulçe, një 41-vjecar nga Berati, i cili kishte dënuar me 65 vjet burg në Greqi për vepra kriminale përfshirë vrasjen, është përfshirë sërish në një skandal të drejtësisë greke. Operacioni i policisë helenike gjatë fundjavës zbuloi një grup të organizuar nga Dulçe, i cili fuste dhe tregtonte drogë brenda burgut të Trikalas. Grupi kishte një mënyrë të organizuar për sigurimin dhe fshehjen e drogës brenda burgut, duke përfshirë transportin e saj nëpër çanta nga persona jashtë burgut.
Policia ka bërë të ditur se grupi mund të ketë fituar rreth 50 mijë euro nga kjo veprimtari e paligjshme. Gjatë operacionit janë sekuestruar sasi të konsiderueshme droge, si 33.6 gram heroinë dhe 1.6 gram kokainë, të fshehura në qelitë e dy të burgosurve. Në Athinë, gjatë arrestimit të pesë personave të tjerë të përfshirë në grup, janë gjetur edhe sasi të tjera të drogës, para dhe pajisje të ndryshme. Policia greke ka vendosur në pranga 7 anëtarët e këtij grupi kriminal, duke synuar të ndalojë aktivitetin e paligjshëm të tregtisë së drogës brenda burgut.
