Në kuadër të përmbylljes së mandatit të dytë qeverisës kryeministri i vendit Edi Rama ka dalë në një deklaratë për mediat.
Rama ka thënë se pavarësisht tërmetit dhe pandemisë, qeveria e tij ka mundur të dalë me vlerësim pozitiv në këtë mandat të dytë.
Sipas tij veprimet e qeverisë në këtë mandate do të lënë gjurmë në historinë politike të vendit.
Në fjalën e tij përmbyllëse të mandatit të dytë qeverisës, Rama deklaroi se qeveria e re kërkon një formacion të mirë qeverisës, një kryesi të mirë të grupit parlamentar, si dhe një stol rezervash të gjatë, për të pasur mundësi energjizimi të partisë.
Kryeministri Edi Rama tha se javën e ardhshme do të shpallë qeverinë e re, të dalë nga zgjedhjet e 25 prillit të 2021.
“Qeveria e re do të shpallet javën e ardhshme dhe ju do të vijoni të gjithë punën deri në minutën e kalimit të detyrës, pa lënë asnjë ditë të shkojë kot. Kemi një skuadër kampione, ku ka shumë zgjedhje për çdo rol. Kampionati 4-vjeçar që ka nisur të nesërmen e zgjedhjeve të fundit kërkon jo vetëm formacion të mirë qeverisës, një kryesi të mirë të grupit parlamentar apo një kryesi efektive të vetë partisë, por një stol rezervash të gjatë, për të pasur mundësi energjizimi të partisë. Me shumë mirënjohje për të gjithë ju, mbështetjen, kontributin, ju falënderoj edhe njëherë për të gjithë këtë periudhë sfiduese kohe”, tha kryeministri.
