Shoqata e Transportit Nderqytetas dhe Rrethqytetas i Udhetarëve ditën e sotme ka paralajmëruar protestën që do të mbahet ditën e mërkurë para Ministrisë së Infrastrukturës dhe Energjisë.
Përmes një njoftimi të shpërndarë në faqen zyrtare në Facebook të shoqatës, shoqata bën me dije se punonjësit do të kërkojnë pagën për ditët që nuk janë në punë, pas shtyrjes së transportit publik me një javë, si dhe hapjen e e transportit publik.
“Vendimi i strukturave shtetërore për shtyrjen me 1 javë të hapjes së transportit publik prek në mënyrë të drejtpërdrejtë të punësuarit në këtë sektor dhe familjet e tyre, për të cilat duhet të akordohet një pagë shtesë. Ju bëjmë me dije që kjo kërkesë është bashkëngjitur kërkesave tona për rifillimin e shërbimit”, thuhet në njoftimin e Shoqatës së Transportit.
Kujtojmë që javën e kaluar Kryetarja e Komitetit Tektnik të Ekspertëve Mira Rakacolli në një njofitm për mediat deklaroi se pas vlerësimit të situatës aktuale të koronavirusit është vendosur shtyrja e transportit publik me të paktën 1 javë.
Kjo pasi transporti publik është cilësuar si aktivitet me rrezikshmëri të lartë të përhapjes së infeksionit.
Madje edhe ekspertët u kanë bërë thirrje qytetarëve që të shmangin përdorimin e transportit publik.
