Shoqata e Bizneseve i ka kërkuar Ministrisë së Shëndetësisë që të ndryshojë orën policore në fuqi për shkak të vëshitrësive të shumta ekonomike me të cilat ata po përballen. Në një letër ata thonë se masat në fuqi duhet të rishikohen duke pasur parasysh edhe numrin e ulët të infektimeve dhe të vdekjeve.
Shoqata e Bizneseve shprehet se goditja që kanë marrë nga një vit pandemi është duke i çuar drejt falimentimit. Ata shprehën se presin një zgjidhje dhe reagim të shpejtë nga ministria, ndryshe do të reagojnë.
Letra e plotë:
Referuar masave në fuqi të VKM dhe Komitetit Teknik të Ekpertëve në kuadër të pandemisë së Covid-19, kërkojmë lehtësira nga ju, pasi ne si biznese po përballemi me vështirësi ekonomike. Ora policore ende në fuqi, na privon nga aktivitetet që ne si biznese (lokale) zhvillojmë; (dasma, gëzime familjare e cermoni të tjera), duke na ushtruar presion të vazhdueshëm dhe nuk na lejojnë të zhvillojmë normalisht aktivitetin tonë ekonomik, brenda orarit të lejuar nga institucionet, çka na vështirëson së tepërmi ekonominë, gjë e cila reflektohet edhe te të ardhurat familjare të çdo drejtuesi biznesi.
Për këtë arsye kërkojmë të rishikohen masat në fuqi, duke patur parasysh edhe numrin e ulët të rasteve me infektime nga covid 19, ashtu sikurse edhe vdekshmërinë. Goditja që kemi marrë nga një vit mbylljeje për shkak të pandemisë së covid 19, dhe orës policore ende në fuqi, do të na e vështirësojë akoma dhe më shumë ekonominë dhe financat, duke na cuar drejt falimentit.
Është e udhës të gjendet një zgjidhje dhe reagim sa më i shpejtë nga ana juaj, në te kundërt edhe ne referuar rregullave e ligjeve në fuqi do të reagojmë.
Duke ju falenderuar,
Shoqatat e bizneseve
