Pronari i një biznesi inertesh në fshatin Bujan të Tropojës është arrestuar pasi një punonjësi i tij ka shkuar pa shenja jete në spital. 48-vjeçari me iniciale Sh.M., u prangos pasi punëtori i ndjerë, 29 vjeç me iniciale A. K. (M.) ndërroi jetë duke rregulluar një makineri.
NJOFTIMI I PLOTË:
Specialistët e Seksionit për Krimet në Komisariatin e Policisë Tropojë arrestuan shtetasin Sh. M., 48 vjeç, banues në fshatin Bujan, pronar i një biznesi inertesh në fshatin Bujan.
Arrestimi i tij u bë pasi, më datë 04.08.2020, ka shkuar në spitalin e qytetit të Bajram Currit, pa shenja jete, një punëtor i këtij biznesi, shtetasi A. K. (M.), 29 vjeç, banues në Bujan, i cili gjatë kohës që ka qenë duke rregulluar një makineri, aksidentalisht ka gjetur vdekjen”.
Ndërkohë, specialistët e Seksionit të Trafikut Interurban dhe Urban Tropojë arrestuan në flagrancë shtetasin M. Q., 22 vjeç, banues në fshatin Tetaj, Tropojë, për veprën penale “Drejtimi i mjetit në mënyrë të parregullt”.
Arrestimi i tij u bë pasi, në aksin rrugor Bajram Curri – Fierzë, u kap duke drejtuar në gjendje të dehur dhe pa leje drejtimi, automjetin tip “Ford”.
Materialet u referuan në Prokurorinë pranë Gjykatës së Shkallës së Parë Tropojë, për veprat penale “Shkelja e rregullave të mbrojtjes në punë” dhe “Drejtimi i automjetit në mënyrë të parregullt”.
