Një rast aspak i zakontë është bërë publik ditën e sotme në media. Një familje e cila jeton në Tiranë në rrugën “Arben Minga” nuk mund të futet dot në shtëpi nëpërmjet shkallëve nga të cilat gjithmonë kanë kaluar, pasi ato janë prishur me vendim gjykate. Kjo ka ndodhur pasi pronës i ka dalë pronari.
Familjarët detyrohen që të futen në shtëpi nëpërmjet një shkalle druri. Familjarja shprehet se prishja ndodhi në 19 janar të 2018-ës, në momentin që ndodheshin për azil në Francë.
Ata janë lajmëruar nga fqinjët , të cilët i kanë dërguar një video.
Familjarja shprehet për Faxnews:
Jemi njoftuar nga komshinjtë për prishjen e shkallëve. Kur shkuam në gjykatë morëm vesh që kishte dalë pronari. Si mund të dalë shtëpia e pabanueshme me vendim gjykate? Si mund të lihet një familje jashtë? Nusja çunit me dy kalamajtë ska ku me hyp. Fëmijëve të vegjël u rrezikohet jeta”.
Më tej ajo ka treguar edhe përballjen në gjykatë. Gruaja shton se pronarit iu kthye toka nga Agjencia e Kthimit të Pronave dhe çdo gjë është bërë me korrupsion.
Ndër të tjera ajo rrëfen se muri është shembur disa herë. Edhe kur ka shkuar në gjykatë, gjykatësja i është drejtuar familjares me fjalët “dil ti andej”. Por gjykatësja e harroi faktin se tashmë shkallët janë shembur e nuk kanë se nga të dalin apo të hyjnë për në shtëpinë e tyre.
