Pasditen e sotme, anëtarja e Kryesisë së PD, Grida Duma, ka komentuar shifrat e publikuara nga kryeministri Rama për përhajen e COVID-19 në Shqipëri.
Duma i quan ato “manipulim” dhe thekson se nuk është aspak papërgjegjshmëri, as ngatërresë shifrash, por strategji malinje që tani nuk habit më askënd.
Sipas ish-deputetes së PD, duhet të marrë fund loja me jetën dhe të bëhet transparencë nga qeveria dhe të thuhet pa frikë e vërteta.
Statusi i plotë
“Grafiku dhe shifrat e publikuara nga Rama janë fallsifikim, manipulim i shifrave të deklaruara nga vetë Ministria e tij. Kjo nuk është aspak papërgjegjshmëri as ngatërresë shifrash, është strategji malinje që tani nuk habit më askënd.
Qëkur shteti drejtohet nga facebook-u dhe shifrat e pandemisë publikohen si të ishin sondazhe opinioni, fshehja dhe manipulimi i realitetit do jetë pasoja më e vogël. Që të marrë fund loja me jetën e njerëzve duhet ne forcë të bëjmë transparencë! Duhet me forcë dhe domosdoshmëri ti vendosim në rolin e vet dinjitoz ekspertët dhe specialistët që ta drejtojnë situatën pa presionin e frikën se po thonë të vërtetën”, shkruan Duma.
Kujtojmë se më herët dyshime për vërtetësinë e shifrave të të prekurve nga koronavirusi në Shqipëri ka hedhur dhe kreu i Partisë Demokratike, Lulzim Basha dhe ish-kryeministri Sali Berisha.
