Asnjë dakordësi mes palëve për vijimin e punimeve të Komisionit Hetimor për koncensionet e Sterilizimit dhe Check-up në Shëndetësi. Të pranishëm sot në sallë ishin vetëm demokratët, pasi anëtarët e Partisë Socialiste zgjodhën sërish bojkotin. (lexo këtu)
Mungesa e korrektësisë, ka bërë që kryetarja e Komisionit Hetimor, Albana Vokshi të kërkojë përjashtimin e dy prej socialistëve, secilin për arsye të ndryshme. Plarent Ndreca sipas saj duhet të largohet pasi ka për qëllim ta drejtojë ai Komisionin, ndërsa Milva Ekonomi, pasi ka konflikt interesi.
“Të përjashtohen Ndreca dhe Ekonomi. Komisioni për kontratat në Shëndetësi, Vokshi: Plarent Ndreca po minon hetimin, do të marrë drejtimin, ndërsa Milva Ekonomi është konflikt interesi,” ka bërë me dije në mbledhjen e sotme Vokshi.
Si përgjigje nga Partia Socialiste ka marrë vetëm një fjali: Nuk do marrim pjesë deri kur mbledhjet dhe rendi i ditës të bëhen me dakordësi.
View this post on Instagram
Ngritja e Komisionit Hetimor për Sterilizimin dhe Check-Up në shëndetësi
Ngritja e Komisionit Hetimor të Kuvendit për Sterilizimin dhe Check-Up në shëndetësi u arrit pas një marrëveshjeje të arritur nga Partia Socialiste me atë demokratike. Por të dyja këto koncensione janë nën hetim nga SPAK. I pari, ai i Sterilizimit, ka sjellë deri më tani arrestimin dhe ngritjen e akuzave ndaj ish-zëvendësministrit të Shëndetësisë, Klodian Rrjepaj dhe biznesmenit Ilir Rrapaj. Nën hetim janë edhe ish-ministri i Shëndetësisë, Ilir Beqja dhe ish-ministri i Financave, Shkëlqim Cani.
Këto koncensione në Shëndetësi kanë ngritur pikëpyetje për korrupsion dhe abuzime. Madje dhe Fondi Monetar Ndërkombëtar ka ngritur vazhdimisht pikëpyetje duke i konsideruar ato si një përdorim “joefikas” i fondeve publike. Po ashtu, edhe opozita ka ngritur herë pas herë akuza se koncensionet kanë qenë abuzim i pastër me paratë e buxhetit të shtetit.
