Shqipëria renditet ndër vendet me barrën më të lartë të shpenzimeve direkte për shëndetin, duke treguar mungesë të theksuar stabiliteti në mbrojtjen financiare që shteti u ofron familjeve për shërbimet bazë. Këto të dhëna dalin nga anketa “Securimetri 2025”, e realizuar nga Këshilli i Bashkëpunimit Rajonal.
Sipas rezultateve zyrtare të anketimit, rreth 57% e familjeve shqiptare deklarojnë se shpenzojnë midis 1% dhe 10% të të ardhurave të tyre totale për vizita mjekësore dhe barna. Ky grup përfaqëson shumicën e popullsisë dhe shënon nivelin më të lartë në të gjithë Ballkanin Perëndimor për këtë kategori shpenzimesh.
Ndërkohë, në vendet fqinje si Bosnja dhe Serbia, një pjesë më e madhe e qytetarëve arrijnë të mbulohen nga skemat publike me kosto minimale. Në Shqipëri, çdo kontakt me sistemin shëndetësor shoqërohet me pagesa që rëndojnë drejtpërdrejt mbi buxhetin e familjeve.
Edhe më shqetësuese janë të dhënat që tregojnë se 27% e familjeve shqiptare detyrohen të alokojnë më shumë se 10% të të ardhurave të tyre për shëndetin. Ky nivel konsiderohet kritik nga Organizata Botërore e Shëndetësisë, pasi shpenzime të tilla rrisin rrezikun e varfërimit për shtresat e mesme dhe të ulëta.
Ndonëse vende si Serbia, me 34%, apo Kosova, me 32%, paraqesin përqindje më të larta në këtë kategori ekstreme, struktura e shpenzimeve në Shqipëri tregon se barra financiare është e shpërndarë më gjerësisht në të gjithë shoqërinë.
Një element që e bën situatën në Shqipëri veçanërisht problematike është numri shumë i ulët i familjeve që paguajnë minimalisht. Vetëm 9% e tyre arrijnë të mbajnë shpenzimet shëndetësore nën nivelin 1%, përqindja më e ulët në Ballkan, ndërkohë që mesatarja rajonale është 13%. Ky tregues sugjeron se mbulimi “falas” i shërbimeve shëndetësore mbetet më shumë në letër sesa në praktikë.
Analistët vlerësojnë se ky trend tregon nevojën për një rishikim urgjent të listës së barnave të rimbursueshme dhe për përmirësimin e menaxhimit të sistemit shëndetësor parësor.
Në një situatë ku pagat po përballen me presionin e inflacionit, fakti që mbi 84% e popullsisë paguan nga xhepi për shëndetin e vendos sigurinë sociale të vendit në një pozicion të brishtë. Kostoja e kujdesit shëndetësor pritet të mbetet një nga pengesat kryesore për mirëqenien e familjeve shqiptare edhe në vitet në vijim./ Monitor
