Avokatja e Popullit, Erinda Ballanca, ka reaguar këtë të hënë lidhur me situatën në Theth, pas debatit publik dhe juridik mbi prishjen e ndërtimeve në këtë zonë malore.
Në një deklaratë publike, Ballanca u shpreh se institucioni që ajo drejton ka nisur hetimet për një rast që lidhet me këtë çështje, megjithatë deri tani nuk është kryer ende një verifikim në terren.
“Në Theth nuk kemi një ankesë formale. Do të duhet që qytetarët të paraqesin ankesa konkrete. Kemi nisur një rast, por për të avancuar, ekipi ynë duhet të kryejë një verifikim në vendngjarje,” tha Ballanca. Ajo shtoi se procesi është në një fazë paraprake dhe se veprimet do të vijojnë në përputhje me hapat e nevojshëm procedurale.
Sipas saj, nga të dhënat paraprake, rezulton se mund të ketë ndërtim pa leje nga ana e disa banorëve.
“Në pamje të parë, duket se mund të ketë shkelje, por kjo nuk është e konfirmuar, pasi nuk kemi ende të gjitha të dhënat e nevojshme,” sqaroi Ballanca.
Ajo theksoi se ndërhyrjet e Avokatit të Popullit nuk mund të bëhen në mënyrë të menjëhershme apo mbi bazën e deklaratave të izoluara. Institucioni kërkon prova konkrete dhe mbështetje nga vetë qytetarët për të ndërmarrë veprime zyrtare.
“Ne nuk dalim me deklarata individuale. Nëse verifikojmë se mund të ketë shkelje të të drejtave të njeriut, mund të nisim një procedurë me iniciativë tonën. Por qytetarët duhet të na japin autorizimin dhe të jenë dakord që të ndjekim rastin e tyre,” shtoi Ballanca.
Në fund, ajo theksoi se institucioni që përfaqëson nuk mbështet asnjë ndërtim të paligjshëm, pavarësisht rrethanave.
