Unaza e Poshtme e qytetit të Burrelit ka dalë jashtë funksionit, duke krijuar vështirësi serioze për banorët që jetojnë përgjatë saj dhe duke ngritur pikëpyetje të forta mbi cilësinë e punimeve të kryera.
Sipas të dhënave nga terreni, rruga ka pësuar katër shembje të konsiderueshme, dy prej të cilave kanë dëmtuar plotësisht trupin e karrexhatës. Situata më problematike paraqitet në anën perëndimore, ku në të paktën dy segmente e gjithë traseja është shembur rëndë, duke e bërë të pamundur qarkullimin e çdo lloj automjeti.
Për pasojë, një pjesë e madhe e banorëve nuk kanë më akses me mjete drejt banesave të tyre, ndërsa përkeqësimi i vazhdueshëm i situatës ka rritur edhe rrezikun për objektet e ndërtuara pranë rrugës.
Rikonstruksioni total i Unazës së Poshtme të Burrelit është financuar nga Autoriteti Rrugor Shqiptar me një fond prej 128 milionë lekësh të reja, rreth 1.3 milionë euro. Projekti ka nisur rreth një vit më parë dhe është zbatuar nga kompania ULZA sh.p.k, në pronësi të ndërtuesit Ndue Shpani. E njëjta kompani ka përfituar më herët edhe disa kontrata të tjera publike në zonën e Matit dhe Bulqizës.
Edhe pse punimet u deklaruan të përfunduara gjatë vitit të kaluar, rruga nuk u vu kurrë në funksion të plotë, pasi dëmtimet nisën që në tetor 2025 si pasojë e reshjeve të shiut. Aktualisht objekti mbetet i pakolauduar dhe i pa marrë në dorëzim nga ARRSH, çka pritet të sjellë nevojën për fonde shtesë për riparimin e dëmeve të shkaktuara.
Kjo nuk është hera e parë që kjo unazë shfaq probleme serioze strukturore. Që prej vitit 2010, segmenti ka qenë thuajse i pakalueshëm për mjetet e tonazhit të rëndë për shkak të shembjeve të përsëritura.
Sipas ekspertëve të fushës, zgjidhja afatgjatë kërkon vendosjen e pilotëve mbajtës në të gjithë gjatësinë e unazës, rreth një kilometër. Ata theksojnë se zona karakterizohet nga prania e lartë e ujërave nëntokësore që vijnë nga qyteti i Burrel, faktor që ndikon drejtpërdrejt në paqëndrueshmërinë e trasesë nëse nuk respektohen standardet teknike të ndërtimit.
