Xhenoveva Ruiz Calavera, Drejtoresha për Ballkanin Perëndimor në Komisionin Evropian e komentoi krijimin e SPAK si një lajm të mirë.
E ftuar në një intervistë për Top Channel ajo tha:
“ Së pari, më lejoni të përgëzoj grupin e prokurorëve që u betuan për pozicionet e reja dhe morën detyrat e tyre, si dhe më lejoni të falënderoj gjithashtu Këshillin e Lartë të Prokurorisë,sepse kanë bërë një punë tërësore për ta bërë të mundur këtë. Është e qartë që ky institucion do të jetë themelor për Shqipërinë për të luftuar krimin e organizuar dhe korrupsionin. Pra, ky është një lajm shumë i mire.’’
Mirëpo, Calavera shprehu shqetësimin e saj sa i përket Gjykatës Kushtetuese.
“Nëse flasim për Gjykatën Kushtetuese, më duhet të ndaj shqetësimin tim. Në situatën ku jemi sot, me një konflikt interpretimi për metodologjinë e emërimit, është një konflikt shumë serioz dhe prandaj Bashkimi Evropian ka kërkuar që në mënyrë që të kapërcehet ngërçi, zyrave të mira të Këshillit të Evropës, Komisionit të Venecias,t’i kërkohet të vijnë që t’i ndihmojnë palët ta kapërcejnë këtë ngërç. Unë inkurajoj që ky hap të ndërmerret sa më shpejt që të jetë e mundur.”
E pyetur për vlerësimin mbi ecurinë e procesit të vettingut dhe zbatimin e tij me ritmet e duhura shefja e ONM tha :
“Mund t’ju them se është një proces shumë gjithëpërfshirës, shumë intensiv, por edhe një proces kompleks që kërkon një investim shumë të rëndësishëm nga institucionet e vetingut. Ata po punojnë me shumë përkushtim, dhe sigurisht po punojnë nën mbikëqyrjen e vëzhguesve ndërkombëtarë,të cilëtkam kënaqësinë t’i drejtoj si Shefe e Zyrës së ONM-së.Deri më tani, institucionet kanë arritur të rivlerësojnë 200 prokurorë dhe është e qartë se disa prej tyre kanë dhënë dorëheqjen në këtë proces ose janë tërhequr. Shumica e largimeve nga detyra kanë ndodhur për shkak të faktit se magjistratët nuk kanë mundur t’i justifikojnë pasuritë që kanë pasur në llogaritë e tyre.Por kemi ende shumë punë përpara. Janë rreth 600 dosje të tjera që duhen përpunuar. Kjo është një punë shumë e vështirë dhe sfiduese.”
Megjithatë, Calavera u shpreh se tashmë institucionet kanë fituar shumë më tepër përvojë se si të procedojnë.
Sipas saj, nuk janë vetëm institucionet e vetingut përgjegjëse për këtë, por duhet të jetë një përparësi kryesore kombëtare, për të gjitha institucionet.
