Gjenerali Leonids Kalnins, shefi i shtabit i ushtrisë në Letoni, ka treguar rrethanat e incidentit të rëndë në Kamp Adazi, ku humbi jetën ushtarakja shqiptare Zarife Hasanaj dhe u plagosën dy të tjerë.
Në një intervistë dhënë për “top-channel,” Leonid Kalnins, Komandanti i Forcave të Armatosura Kombëtare (NAF) të Letonisë shpjegon se ushtarët e kontingjentit shqiptar ishin të angazhuar në neutralizimin e armëve të pashpërthyera dhe në kohën e aksidentit po përgatiteshin për trajnimin në terren.
“Ka ndodhur përpara trajnimit të vërtetë. Trajnimi ishte i përbashkët me kontigjentin polak të një kompanie tankesh. Ata po tentonin të realizonin një qitje reale të ngjashme me situatë lufte. Ekipi shqiptar po përgatiste zonën nga ku më pas do të zhvillohej trajnimi në bazë të specifikave të caktuara.”
Gjithashtu ai shtoi: ”Ne i marrim shumë seriozisht çështjet e sigurisë gjatë trajnimeve. Të gjithë ushtarakët, përfshi ata shqiptarë janë të mirëtrajnuar pasi ka procedura standarde për ata që përfshihen në misionet e heqjes së minave. Ne i besojmë të gjitha ato mjete që përdorim në trajnime. 1 në 10 milionë është probabiliteti për të ndodhur diçka e tillë. Është një ngjarje për të ardhur shumë keq dhe ngushëllimet e thella shkojnë tek ushtarakët shqiptarë. Unë besoj se ushtarakët shqiptarë janë ndjekës besnikë të të gjitha rregullave dhe për të ekzekutuar me përgjegjësi detyrat. Këto trajnime përfshijnë ushtarakë të 9 shteteve të ndryshme. Ndodhin çdo ditë. Kompanitë e tankeve zhvillojnë ushtrime taktike për specialitetin e tyre, ndërsa skuadra IOD që është nga Shqipëria kanë detyrat e tyre në fushëbetejë.”
Në Letoni, ndodhen rreth 20 inxhinierë shqiptarë për demontimin e armëve në kuadër të aktivitetit të NATO-s.
