Ministrja e Arsimit, Rinisë dhe Sporteve, Besa Shahini, ka reaguar për protestën e maturantëve që po zhvillohet poshtë zyrës së saj pas provimit të maturës në lëndën “Letërsi dhe Gjuhë Shqipe”, që u zhvillua ditën e djeshme.
Ata janë shprehur se testimi ishte mbi nivelin mesatar dhe jo i mirorganizuar dhe kërkojnë që Ministria të ndryshojë mënyrën e vlerësimit, pasi në të kundërt do bojkotojnë dy provimet e ardhshme.
Shahini shprehet se e ka ndjekur me keqardhje protestën, por shton se nuk beson se të ketë ndodhur ndokund tjetër që nxënësit të protestojnë për “provimet e vështira”.
Në një reagim në rrjetet sociale ajo shkruan se provimet kombëtare hartohen nga ekspertë provimesh dhe ajo i beson Qendrës së Shërbimeve Arsimore, institucion i cili ka thënë se këtë vit provimet ishin më të lehta se kurdoherë më parë.
Më tej, Shahini shprehet se QSHA ka adresuar kërkesat në lidhje me provimet e maturës që ishin protokolluar në Ministri, teksa bën me dije se do të kallëzojnë çdo shpifje që opozita ka publikuar në lidhje me maturën sivjet.
REAGIMI I PLOTË
Ndoqa me keqardhje protestën pranë ndërtesës së Ministrisë së Arsimit, Sportit dhe Rinisë. Nuk besoj të ketë ndodhur ndokund tjetër që nxënësit të protestojnë për “provimet e vështira”! Megjithatë, keqardhja për nxënësit “protestues” më vjen bashkë me revoltën ndaj nxitësve të tyre! Fatkeqësisht, nxitësit janë publikisht të afishuar dhe nuk janë zëdhënës opinionesh dosido. Ata janë opozita politike e vendit! Që është një absurditet unik: opozita nxit dhe mbështet protestë kundër testeve kombëtare!!! Opozita stimulon “lehtësimin” e dhënies së notave për nxënësit!!! Po mbase këtu s’ka asgjë të re, përderisa kjo opozitë ishte dje qeveria e notave fallco, diplomave fallco, universiteteve fallco, provimeve fallco, promovimeve fallco…🤦🏻♀️ Provimet Kombëtare hartohen nga ekspertë provimesh. Unë i besoj Qendrës së Shërbimeve Arsimore (QSHA) kur thotë se sivjet provimet janë më të lehta se kurdoherë më parë sepse ndodhin pas një gjendjeje të jashtëzakonshme dhe prandaj janë konceptuar vetëm me alternativa – PA TEMAT që janë zhvilluar në kushte shtëpie. Dhe kjo, vërtetohet lehtësisht në fund, kur të mblidhen të gjitha rezultatet dhe nëse rastis që testi të ketë qenë më i vështirë se sa njohuritë e nxënësve, atëherë QSHA BËN RISHPËRNDARJE TË PESHËS SË PIKËVE PËR ÇDO NOTË. Por, këto çështje teknike s’kanë as lidhje e as vend për debate politike dhe jo më për protesta opozitare. QSHA ka adresuar kërkesat në lidhje me provimet e maturës që ishin protokolluar në Ministri. Ndërkohë, ne do të kallëzojmë çdo shpifje që opozita ka publikuar në lidhje me maturën sivjet. Besoj se edhe kjo do të shërbejë në edukimin e të rinjve, duke nisur nga të rinjtë e forumeve politike, për të mësuar se shpifja është gënjeshtër e dënueshme me ligj e jo liri fjale për çfarëdo kundërshtie qytetare apo opozitare.
