Sërish një kontejner me banane është gjetur i hapur në portin e Durrësit këtë mëngjes.
Ndërkohë që autoritetet dyshojnë për drogë, e për pasojë në polici janë shoqëruar 30 punonjës të sigurisë portuale në Durrës si edhe punonjës që veprojnë në sheshin e kontejnerëve. Policia dyshon se brenda kontejnerit mund të ketë pasur lëndë narkotike. Bëhet e ditur se kontejneri ka ardhur nga Amerika Latine disa ditë më parë.
Kujtojmë që skandali i “Bana King” ku në kontejnerin e saj në magazinat e vendosura në Vaqarr u gjetën 119 kg kokainë, jo vetëm nuk solli reagime nga instancat përkatëse, por edhe liroi të arrestuarit të cilët ‘mbyllën sytë’ përpara skanerit në Durrës.
Lavdosh Zerba dhe Julian Merhori, punonjës në doganën e Durrësit dhe Bujar Qyrku punonjës i AKU-së u prangosën pasi lejuan që të kalojë kamioni i “Bana King” me kokainë, teksa në skaner nuk u konstatua droga, por kur u kontrollua nga policia u gjetën 119 kg kokainë e cila vinte nga Ekuadori dhe ishte fshehur në kamionët me banane të kompanisë “Bana King”. Por edhe pse u arrestuan, të dyshuarit për skandalin u liruan.
Nga gjithë ky skandal, kuptohet që në vendin tonë, fajtorët lirohen nga burgu dhe skandali mbetet pa një person përgjegjës në krye. Pyetja që lind është: Çfarë ka ndodhur me drogën e sekuestruar dhe a do të bie Çuçi, Nano dhe SPAK në gjurmët e përgjegjësve të skandalit të kokainës të sekuestruar në kontejnerin e “Bana King”?!
