Federata Serbe e Futbollit ka njoftuar zyrtarisht se përfaqësuesja e tyre do të zhvillojë dy prej ndeshjeve më të rëndësishme kualifikuese për Kupën e Botës 2026 në stadiumin “Rajko Mitić” të Beogradit, përfshirë përballjen me Shqipërinë më 11 tetor dhe atë kundër Anglisë më 9 shtator.
Ndërkohë, sfida e fundit e raundit kundër Letonisë do të luhet në stadiumin “Dubočica” në qytetin e Leskovcit.
Në komunikatën për shtyp, federata serbe sqaron se pas një analize të detajuar që përfshinte aspekte sportive, organizative dhe të sigurisë, si dhe pas konsultimeve me UEFA, u vendos që stadiumi “Rajko Mitić”, më i madhi në Serbi , të jetë impianti pritës për dy ndeshjet kryesore të grupit.
Qëllimi është të ofrohen kushte optimale për kombëtaren serbe në përpjekjet e saj drejt Botërorit që do të mbahet në SHBA, Kanada dhe Meksikë në vitin 2026.
FSS falënderoi tifozët për mbështetjen e deritanishme në eliminatoret dhe Ligën e Kombeve, duke i ftuar të mbushin stadiumet në ndeshjet e ardhshme, sidomos ato me peshë të madhe si kundër Anglisë dhe Shqipërisë.
“Shpresojmë që në sfidën kundër Letonisë në Leskovac, ku skuadra dhe trajneri Stojkoviq ndihen si në shtëpi, të kemi arsye për të festuar,” thuhet në deklaratë.
Serbia ka zhvilluar dy ndeshje deri tani në kuadër të kualifikueseve, duke grumbulluar katër pikë: një barazim 0-0 me Shqipërinë në Tiranë dhe një fitore bindëse 3-0 ndaj Andorrës në Leskovac.
