Ditën e sotme pritet të zhvillohet një seancë në Gjykatën Penale, për Izet Haxhinë, në lidhje me dosjen e bujshme të vrasjes së Azem Hajdarit. Nga sa mësohet, Haxhia ka kërkuar plot 18 dëshmitarë të flasin për këtë vrasje, mes tyre edhe ish-kryeministri Sali Berisha.
Dëshmitarët e kërkuar janë:
– Zenel Neza
– Jaho Mulosmani
– Sali Berisha
– Mbesa e Sali Berishës, Shpresa Breçani
– Vëllai i Zenel Nezës, Haki Neza
– Afrim Krasniqi
– Ylli Rakipi
– Shaban Memia
– Dem Dollapi
– Sali Lusha
– Genc Hoti
– Agim Logu
– Mentor Daja
– Ismet Jovani
– Aishe Haklaj
– Zylfie Haklaj
– Marjam Gryku
Seanca për Izet Haxhinë vjen pas rinisjes nga e para të hetimeve për vrasjen e Azem Hajdarit.
Izet Haxhia është dënuar në mungesë me 25 vite burg për vrasjen e ish-deputetit Azem Hajdari. Pas 17 vitesh në mungesë dhe azil në Turqi, Haxhia është rikthyer me vullnetin e tij në Shqipëri duke kërkuar rihapjen e dosjes, pasi ai kurrë nuk i ka pranuar akuzat e ekzekutimit të deputetit Azem Hajdarit në vitin 1998. Sipas Haxhisë, ai nuk ka pasur lidhje me atentatin, ndërsa i dënuar është edhe vëllai i tij, Ismeti. Dëshmitarët kanë pretenduar se ishte Haxhia personi që e nxiti deputetin Hajdati që të dilte jashtë selisë dhe të përballej me Fatmir Haklajn.
Gjithashtu, janë zbuluar edhe detaje nga dokumenti që avokati i Haxhisë, Idajet Beqiri, ka argumentuar se pse ndër të tjerë, është thirrur edhe vetë Sali Berisha si dëshmitar.
Sipas avokatit, Sali Berisha u njoftua nga mbesa për vrasësit e Azem Hajdarit një orë para ngjarjes së rëndë. Ai shkruan më tej se Berisha nuk njoftoi policinë, por urdhëroi Azemin që të shkonte të sqarohej me ta.
“Mbesa e Sali Berishës, Shpresa Breçani te lokali pranë PD-së, i Guxim Biberaj. Ajo i pa Jaho Mulosmani, Fatmir Haklaj dhe Nazmi Çangu afro një orë para ngjarjes. I njihte shumë mirë ata dhe ka shkuar në zyrën e Berishës dhe në prani të dëshmitarit Fisnik Sina dhe të ndjerës Linda Ihsani, e ka vënë në dijeni se kush ishin brenda në autoveturën me targa VL0676. Sali Berisha duhet të japë versionin e tij se përse në një situatë , kur u njoftua nga mbesa e tij në vend që të njoftonte organet e policisë së Shtetit, Ministrin e Brendshëm, Presidentin e Republikës, urdhëroi Azen Hajdarin që të shkonte te kjo autoveturë dhe të merrej vesh me ta”, thuhet në dokument.
/GazetaReforma.com/
