Gjykata Kushtetuese sot zhvilloi sërish seancën për të shqyrtuar kërkesën për shkarkimin ose të Presidentit të Republikës, Ilir Meta. Këshilltari i presidentit Meta, Bledar Dervishaj i ka bërë një kërkesë të re gjykatës, për të paraqitur materiale shtesë.
Ka zgjatur rreth 3 orë seanca e tretë në Gjykatën Kushtetuese për shkarkimin e Presidentit Ilir Meta. Pasi palët dhanë konkluzionet e tyre përfundimtare, Gjykata Kushtetuese mbylli seancën dhe është tërhequr për vendim. Gazetarja Klesiana Omeri raporton se vendimi i arsyetuar do të jepet me shkrim brenda 30 ditëve.
Në përfundim të seancës kanë folur për mediat përfaqësuesit e Presidentit Meta dhe të Kuvendit.
Këshilltari i Metës, Bledar Dervishaj tha se Kuvendi ka depozituar prova shkresore të manipuluara. Për këtë çështje ai tha se Presidenti do t’i drejtohet prokurorisë.
“Për fat të keq u provua edhe sot se Kuvendi në përmbushje të qëllimeve politike edhe së fundmi depozitoi prova shkresore të manipuluara vetëm me qëllimin që t’i rrëzoheshin pretendimet e kreut të shtetit. Kur kjo ndodh me Presidentin, për një çështje me kaq rëndësi, për një çështje që nuk duhet të ekzistonte dhe pa lëndë imagjino çfarë mund të mendojmë ne si qytetarë se çfarë ndodh në organet e tjera fundore. Kështu që Presidenti ka vendosur t’i drejtohet organi të prokurorisë lidhur me këtë çështje, ashtu sikundër është e drejta e Kuvendit të fillojë një procedurë hetimore parlamentare për këtë shkak që evidentuam para gjykatës. Ashtu sikundër është në të drejtë të gjykatës që të marrë një vendim, por që duhet të jetë i bazuar në Kushtetutë dhe ligj”, u shpreh Dervishaj.
