Sot, më 23 dhjetor 2024, në Gjykatën e Shkallës së Parë të Elbasanit, do të zhvillohet një seancë për ish-kryebashkiakun e Kukësit, Safet Gjici, i cili ka kërkuar të vuajë pjesën e mbetur të dënimit në shtëpi për shkak të problemeve shëndetësore.
Gjatë seancës, pritet që ekspertët e Institutit të Mjekësisë Ligjore të Tiranës të japin përgjigje për 11 pyetje të caktuara nga gjykata në lidhje me gjendjen shëndetësore të Gjicit.
1. A vuan shtetasi Safet Gjici nga ndonjë sëmundje, nëse po, paraqisni, një historik të sëmundjes së tij nga koha e arrestimit të tij e deri në datën e kryerjes së ekzaminimit objektiv dhe cila është diagnoza?
2. Cilat janë patologjitë që konstatohen tek kërkuesi Safet Gjici?
3. A vuan kërkuesi nga diabeti dhe nëse po, cila eshtë shkalla e sëmundjes, pasojat e shkaktuara, terapia e ndjekur, a ka qënë efektive ajo dhe cili është mjekimi më i përshtatshëm që rekomandohet?
4. A ka shkaktuar diabeti insufiçencë të organeve jetësore?
5. A vuan kërkuesi Safet Gjici nga probleme kardio-vaskulare dhe nëse po cila ёshtë diagnoza?
6. A ka pasur përkeqësim të gjendjes shëndetësore të kërkuesit Safet Gjici gjatë qëndrimit në Institucionet e Ekzekutimit të Vendimeve Penale, nëse po, a ka marrë trajtimin e përshtatshëm?
7. A van nga ndonjë sëmundje veçanërisht e rëndë, shtetasi Safet Gjici?
8. A ka nevojë kërkuesi për trajtim të specializuar dhe nëse po, a e ofron Institucioni Mjekësor ku ai është akomoduar këtё trajtim?
9. Në momentin e kryerjes së ekzaminimit objektiv, cila është gjëndja shëndetësore e kërkuesit, a është e tillë, që përben rrezik për jetën e kërkuesit?
10. Nëse po, cila është terapia efektive e përshtatshme për eleminimin e këtij rreziku dhe a e mundëson Institucioni Mjekësor ku gjendet aktualisht?
11. A rrezikohet jeta e kërkuesit nëse qëndron i izoluar në Institucionin e Ekzekutimit të Vendimeve Penale?
Në seancën e mëparshme, më 14 nëntor 2024, për arsye shëndetësore, Gjici nuk u paraqit, por u pranishëm mbrojtja, organi i akuzës dhe ekspertët mjeko-ligjorë.
Ekspertët do të japin përgjigje për pyetje që lidhen me problemet e tij kardiovaskulare, zmadhimin e aortës dhe diabetin, që sipas avokatit të tij, Markeljan Jance, janë përkeqësuar për shkak të kushteve të burgut.
Aktualisht, Gjici po kurohet në një klinikë mjekësore pas problemeve të mëdha shëndetësore që ka përjetuar gjatë kohës së burgosjes.
