Këtë të enjte Kuvendi do të mblidhet në seancë plenare. Në çështjet që do të trajtohen ditën e sotme është projektligji “Për aderimin e Republikës së Shqipërisë në Konventën mbi Organizatën Ndërkombëtare për ndihmat detare në lundrim”.
Gjithashtu do të diskutohet projektvendimi “Për zgjedhjen e një anëtari në Këshillin e Lartë të Prokurorisë nga trupa e pedagogëve dhe Shkolla e Magjistraturës”.
Ndërkohë që pritet të diskutohet edhe mbi projektvendimin “Për emërimin e një anëtari të Bordit të Entit Rregullator të Energjisë Elektrike” si dhe “Për zgjedhjen e z.Edmond Tullumani anëtar të Këshillit Drejtues të Radiotelevizionit Shqiptar”.
Kuvendi gjithashtu do të diskutojë edhe projektvendimin “Për disa shtesa dhe ndryshime në vendimin e Kuvendit nr.67/2020 “Për miratimin e strukturës, organikës dhe klasifikimit të pagave të personelit me kohë të plotë pune të Komisionit Qendror të Zgjedhjeve”.
Në rend të ditës parashikohet edhe diskutimi i projektvendimit “Për miratimin e strukturës, organikës dhe klasifikimit të pagave të personelit me kohë jo të plotë pune, që rekrutohet për periudhën zgjedhore, të Komisionit Qendror të Zgjedhjeve”.
Kuvendi pritet të diskutojë edhe projektvendimin “Për miratimin e strukturës, organikës dhe klasifikimit të pagave të personelit me kohë jo të plotë pune, që rekrutohet për përpunimin e materialeve zgjedhore, të Komisionit Qendror të Zgjedhjeve”.
