Një vizitë turistike në Shqipëri për një 19-vjeçar francez ka përfunduar në arrest. Vetëm një ditë pas mbërritjes në Tiranë me familjen, i riu me inicialet K. L. u ndalua nga policia, pasi gjatë një kontrolli në çantën marsup iu gjetën 8.2 gram kanabis. Arrestimi ndodhi teksa ai po udhëtonte me taksi nga ish-Blloku drejt një hoteli në Fushë-Krujë.
Pas 48 orësh në paraburgim, i riu u paraqit para gjykatës, e cila vendosi ta lirojë, duke caktuar masën e sigurisë “detyrim për paraqitje”, ndërsa hetimet për veprën penale të “prodhimit dhe shitjes së narkotikëve” do të vijojnë.
Në sallën e gjyqit, turisti u shfaq i penduar dhe deklaroi se nuk ishte në dijeni se në Shqipëri mbajtja e kanabisit ishte e ndaluar. “Kam ardhur për të vizituar vendin me familjen. Lëndën narkotike e bleva pranë një diskoteke nga një person që nuk e njoh, vetëm për përdorim vetjak, pasi e konsumoj prej gjashtë vitesh. Nuk dija se këtu nuk lejohet. Jam në gjendje të rënduar emocionale dhe shëndetësore”, tha ai.
Prokuroria dhe gjyqtarja Adelajda Gjuzi morën në konsideratë faktin se sasia e kanabisit ishte e vogël, mënyra e kryerjes ishte e lehtë dhe se i dyshuari vinte nga një kulturë ku mbajtja për përdorim vetjak nuk shihet si vepër penale. Në vendim, gjykata theksoi se 8.2 gramët e sekuestruar, së bashku me ambalazhin, nuk përbënin rrezikshmëri të lartë.
